Gönguleiðir ennþá lokaðar á kvöldin: „Gossvæðið er hættulegt svæði“

Lög­reglan metur aðstæður þannig að ennþá verði gossvæð­inu lokað eftir kl. 18:00 út af örygg­is­á­stæðum.

„Að mati lög­reglu­stjóra er ekki for­svar­an­legt að halda göngu­leiðum opnum allan sól­ar­hring­inn. Af örygg­is­á­stæðum verður göngu­leiðum frá Suð­ur­strand­ar­vegi því lokað dag­lega kl. 18, eða fyrr eða seinna eftir atvikum, þegar opið er. Sú ákvörðun gildir á meðan gos stendur yfir við fjallið Litla Hrút. Vig­dís­ar­valla­vegi verður lokað sam­hliða lokun göngu­leiða,“ sagði í til­kynn­ingu frá lög­reglu. Þá hafi rúm­lega 3500 manns farið inn á gossvæðið í gær og allt gengið að mestu vel.

„Leið upp að gos­s­töðv­unum er það sem við­bragðs­að­ilar kalla Mera­dala­leið. Ganga þarf um 18 km leið fram og til baka. Göngu­ferðin hentar því alls ekki öllum. Gangan fram og til baka getur tekið 5 til 7 klukku­stundir. Aðrar merktar göngu­leiðir eru jafn­framt opnar. Mera­dala­leið (leiðEE) var opnuð dag­inn eftir að gos hófst. Leiðin liggur til norð­aust­urs frá bíla­stæði í Stóra Leirdal í átt að útsýn­is­stað á Hraunsels – Vatns­felli,“ og er almenn­ingur minntur á að hlýða fyr­ir­mælum lög­reglu og að halda sig frá hættu­svæðum. Þá mælir lög­reglan með ryk­grímum til að forð­ast megum. Lög­reglan leggur til að börn þung­aðar konur og fólk með hjarta- eða lunga­sjúk­dóma láti það vera að mæta á svæðið.

„Mik­il­vægt er að hafa í huga að gossvæðið er hættu­legt svæði þar sem aðstæður geta breyst skyndi­lega. Lögregla varar fólk við að dvelja nærri gos­s­töðv­unum vegna gasmeng­unar. Hætta eykst þegar vind lægir. Þá geta lífs­hættu­legar gas­teg­undir safn­ast í dældum og geta reynst ban­vænar. Nýjar gossprungur geta opn­ast með litlum fyr­ir­vara og gló­andi hraun getur fallið úr hraunjaðri og hröð og skyndi­leg fram­hlaup orðið þar sem nýjar hrauntungur brjót­ast fram sem erfitt getur verið að forð­ast á hlaupum.“

Þá er fólk að lokun minnt á að leggja bílum sínum í stæði við Suð­ur­strand­ar­veg.