Guðmundur heiðraður fyrir að stuðla að þátttöku transfólks í íþróttum: „Eðlilegt og sjálfsagt”

Guð­mundur Guð­jóns­son hlaut um helg­ina verð­laun fyrir vinnu sína með trans og kynsegin fólki.

„Ég var ekki lát­inn vita fyr­ir­fram að ég yrði sæmdur þessum verð­launum, og vissi það í raun ekki fyrir víst fyrr en nafnið mitt kom upp á skjá­inn við lok heims­þings­ins,” sagði Guð­mundur Guð­jóns­son, for­maður Bog­fimi­sam­bands Íslands, í við­tali á heima­síðu Bog­fimi­sam­bands Íslands.

„Verð­launin tengj­ast að mestu verk­efnum sem ég hef unnið til að stuðla að þátt­töku trans og kynsegin fólks í íþrótt­inni. Fólk alstaðar að úr heim­inum innan íþrótt­ar­innar hefur verið að hafa sam­band og óska mér til ham­ingju með verð­launin síðan þá,” en Guð­mundur fékk verð­launin afhent á heims­þingi Alþjóða­bog­fimi­sam­bands­ins en verð­launin eru veitt fyrir störf í þágu jafn­rétti kynj­anna. Verð­launin voru afhent í fyrsta skipti árið 2009 og hafa aðeins tveir karl­menn fengið þessi verð­laun.

„Þó að mér finn­ist það sjálfum frekar vand­ræða­legt að fá verð­laun fyrir eitt­hvað sem mér þykir per­sónu­lega að ætti að vera eðli­legt og sjálf­sagt, eins og þátt­taka hinsegin fólks í íþróttum, þá tel ég þessi verð­laun gott for­dæmi og hvatn­ing fyrir aðrar þjóðir til að fylgja og skil því vel afhverju mér voru veitt þau,“ sagði Guð­mundur en það var Ugur Erdener, for­maður Alþjóða­bog­fimi­sam­bands­ins, sem afhenti Guðmundi verð­launin.