Í gær voru stofnuð Hagsmunasamtök þolenda kynferðisofbeldis.
Hagsmunasamtök þolenda kynferðisofbeldis voru stofnuð í gær en stofnendur þeirra telja vera mikil þörf á samtökunum. „Markmið félagsins er bæði að fræða og auka réttarstöðu þolenda. Eins og staðan er í dag þá eru brotaþolar bara vitni og vettvangur glæps. Það er rosalega skrýtið að það sé hægt að reka slíkt mál án þess að brotaþoli komi nálægt því. Og þetta er bara eitt af því sem þarf að breyta,“ sagði Guðný Bjarnadóttir, einn stofnanda Hagsmunasamtaka þolenda, í samtali við RÚV um málið en hún er sjálf þolandi og fannst vanta stuðning við þolendur sem vilji kæra árásarmenn sína.
Guðný segist vera ósátt við vinnubrögð lögreglunnar og nefnir sem dæmi að það hafi liðið um það bil hálft ár frá því að hún kærði árásarmann sinn þar til hann var kallaður til skýrslutöku. Þá segist hún hafa þurft á stuðningi að halda sem samtökin muni reyna að veita. „Þegar maður fór svo og kærði, þá komst ég að því að maður er bara einn, það er enginn sem heldur utan um þig, í gegnum réttarkerfið. Og það er bara óásættanlegt.“
Athugasemdir