Átök innan borgarstjórnarflokks Sjálfstæðisflokksins í Reykjavík eru sagan endalausa. Á seinasta kjörtímabili þurfti Eyþór Arnalds, þáverandi leiðtogi, að gjalda fyrir óeiningu innan flokksins. Hildur Björnsdóttur borgarfulltrúi er sögð hafa grafið stöðugt undan leiðtoga sínum sem á endanum varð til þess að hann hvarf á braut, fullsaddur pólitískra lífdaga.
Hildur hreppti það hnoss að eftir harða baráttu að verða leiðtogi flokksins. Þar með vildu menn trúa því að flokkurinn gengi samstiga fram gegn sameinuðu veldi Dags B. Eggertssonar borgarstjóra. En það er öðru nær. Hermt er að Hildur sé einangruð í eigin flokki og eini borgarfulltrúinn sem styðji hana sé Friðjón Friðjónsson.
Hildi er helst legið á hálsi fyrir að styðja Dag borgarstjóra og vera honum handgengin í málum sem snúa að borgarlínunni væntanlegu. Sú afstaða hennar hefur vakið upp mikla úlfúð hjá þeim flokksystkinum hennar sem vilja borgarlínuna út í veður og vind. Þá þykir hún ekki halda úti öflugu andófi gegn meirihlutanum og vera lítt sýnileg. Áhugavert er að Kjartan Magnússon borgarfulltrúi er einn helsti talsmaður minnihlutans út á við og kemur í raun fram sem leiðtogi á meðan Hildur er týnd og horfin í skugga innanflokksdeilna …
Athugasemdir