Kallar eftir tafarlausu vopnahléi í norðurhluta Gaza: „Dauðafnykur umlykur allt“

Yfir­maður hjálp­ar­stofn­unar Sam­ein­uðu þjóð­anna fyrir palest­ínska flótta­menn (UNRWA), Philippe Lazzarini, hefur gefið út brýna beiðni um að gera hlé á átökum á norð­ur­hluta Gaza til að leyfa mann­úð­ar­að­stoð að ná til óbreyttra borg­ara sem eru fastir þar.

Í færslu á X sagði Lazzarini að starfs­menn UNRWA greindu frá því að þeir gætu ekki fundið mat, vatn eða lyf á stríðs­hrjáða svæð­inu.

„Dauðafnykur umlykur allt, þar sem lík eru skilin eftir liggj­andi á vegum úti eða undir rúst­unum. Til­raunum til að sækja líkin eða veita mann­úð­ar­að­stoð er hafnað.“

Lazzarini biður um „taf­ar­laust vopna­hlé, jafn­vel þó ekki væri nema í nokkrar klukku­stundir“, til að leyfa fjöl­skyldum að kom­ast í öruggt skjól.

„Þetta er algjört lág­mark til að bjarga lífi óbreyttra borg­ara sem hafa ekk­ert með þessi átök að gera,“ sagði hann.

Önnur þjóðernishreinsunarherferð

Mohamad Elmasry hjá Doha Institute for Graduate Studies segir að nýjasta árás Ísraels á norð­ur­hluta Gaza hafi verið „önnur þjóð­ern­is­hreins­un­ar­her­ferð“ sem hafi verið að þró­ast.

„Að sumu leyti minnir þetta mig á 1948,“ sagði Elmasry við Al Jazeera og vís­aði til Nakba – þegar Palest­ínu­menn voru reknir úr landi. „Og ég held að við séum að sjá aðra þjóð­ern­is­hreinsun þró­ast fyrir augum okkar árið 2024,“ sagði Elmasry, fjöl­miðla­fræði­pró­fessor, við Al Jazeera.

Elmasry sagði að mik­il­vægt væri að taka eftir hug­tak­inu „Stór-Ísrael“, sem hann sagði vera með „djúpar rætur í stefnu Ísrael og í zíoniskri heim­speki“.

„Það er þessi hug­mynd, byggð á bibl­íutúlk­unum að allt þetta land eigi að vera fyrir gyð­inga og í því skyni er nauð­syn­legt að flytja arababúa,“ bætti hann við.

Elmasry benti á að fyrstu vik­urnar eftir 7. októ­ber hafi Ísraelar beitt sér fyrir því að Egypta­land og Evr­ópu­sam­bandið myndi fjar­lægja Palest­ínu­menn „út af Gaza“.

„Net­anyahu leit­aði til eins af nán­ustu aðstoð­ar­mönnum sínum, Ron Dermer … á fyrstu vikum eftir stríðið til að búa til áætlun um að „þynna út íbúa Gaza“,“ sagði hann og vitn­aði þar í orð Net­anyahu.

Und­an­farna daga og vikur hefur Ísra­els­her stór­aukið árásir sínar á norð­ur­hluta Gaza en um helg­ina drápu þeir að minnsta kosti 87 manns í sprengju­árásum á heim­ili í bænum Beit Lahiya í Norður-Gaza.