Mikil stemning ríkti þegar 120 íslenskar konur komu saman til að heiðra framúrskarandi fyrirmyndir á Norðurbryggju í Kaupmannahöfn á laugardaginn 26. október, að því fram kemur í fréttatilkynningu. Tilefnið var ráðstefna Félags kvenna í atvinnulífinu í Danmörku (FKA-DK): Forystukonur – Seigla og Sigrar. Þetta er í annað sinn sem félagið heldur ráðstefnu af þessu tagi og komust færri að en vildu. Samkvæmt fréttatilkynningunni var uppselt á ráðstefnuna og stemningin frábær enda dagskráin fjölbreytt og skemmtileg.
Í tilkynningunni segir að innblástur og orka hafi fyllt salinn á Norðurbryggju þegar fjórar áhrifakonur úr atvinnulífinu héldu erindi, konur sem allar hafa rutt veginn með þrautseigju og þekkingu hver á sínu sviði. Það voru þær Fida Abu Libdeh stofnandi og forstjóri GeoSilica, Gerður Arinbjarnar, stofnandi og forstjóri Blush, Guðný Lára Árnadóttir, verkefnastjóri hjá Moon og Þórey Vilhjálmsdóttir Proppé, stofnandi og framkvæmdastjóri Öldu sem allar héldu kröftug erindi fyrir ráðstefnugesti. Laufey Karítas Einarsdóttir Langkjær, eigandi Karitas Flow, bauð upp á stutta hugleiðslu og einnig nutu gestir örtónleika með Katrínu Helgu Ólafsdóttur, K.óla, listakonu og tónskáldi.
Formlegri dagskrá lauk með pallborðsumræðum þar sem ráðstefnugestir gátu lagt spurningar fyrir fyrirlesara dagsins og sköpuðust þannig mjög líflegar umræður. Ráðstefnugestir höfðu einnig nægan tíma til þess að efla tengslanetið, sem er mikilvægur liður í starfi félagsins. Að lokinni formlegri dagskrá hélt gleðin áfram, langt fram á kvöld.
Veitingar dagsins voru með íslensku ívafi, en boðið var upp á hið alíslenska Dóttir skyr sem er nýtt á dönskum markaði, Collab sá um að halda ráðstefnugestum á tánum og íslenska bakaríið Bake My Day, sem rekið er af Ynju Mist Aradóttur bauð upp á dásamlegar kræsingar. Jökla, hágæða íslenski rjómalíkjörinn, setti síðan svip sinn á gleðina þegar leið á kvöldið.
Rúsínan í pylsuendanum var „þynnkuþramm“ með Ástu Stefánsdóttur, eiganda Ferða um Kaupmannahöfn á sunnudeginum. Ásta leiddi stóran hóp ráðstefnugesta um Íslendingaslóðir í gamla miðaldabæ Kaupmannahafnar.
Icelandair, dyggur stuðningsaðili félagsins, var aðalstyrktaraðili ráðstefnunnar en hátt í 30 fyrirtæki studdu við félagið og ráðstefnuna með einum eða öðrum hætti.
Fyrirtæki sem studdu ráðstefnuna voru: 66°Norður, Anna Marta, Bake My Day, Bioeffect, Blush, Boozt, Collab, Dóttir Hot Yoga, Dóttir Skin, Dóttir Skyr, Dropi, Einrúm, Female Invest, Ferðir um Kaupmannahöfn, Garnkiosken, GeoSilica, Good Good, Icelandair, Inspiration Center Denmark, Jódís, June Salon, Jökla, Saga Natura og Floeralis, Saltverk, Sif Jakobs, Storytel og Tommi’s Burger Joint DK.
Félag kvenna í atvinnulífinu í Danmörku, FKA-DK, var stofnað árið 2014 og fagnar því 10 ára starfsafmæli um þessar mundir. Félagið býður íslenskum konum upp á faglegan vettvang til tengslamyndunar og innblásturs, þar sem styrkur og hvatning eru í hávegum höfð og unnið er markvisst að því að auka sýnileika og tækifæri félagskvenna. FKA-DK heldur alla jafna 6 – 8 viðburði á ári hverju, sem eru ávallt vel sóttir.
Athugasemdir