Í dag fór í dreifingu myndband á netinu þar sem sjá má ísraelska hermenn sprengja íbúðarhús á Gaza en hermennirnir láta í það skína að þeir noti sprengjuna sem kynjaafhjúpun þar sem blár reykur stígur upp úr rústunum og hlátur heyrist í bakgrunni. Þetta kemur fram í frétt Al Jazeera.
Myndbandið, sem sagt er hafa verið birt af hermönnunum sjálfum á samfélagsmiðlum, sýnir öfluga sprengingu jafna byggingu við jörðu í íbúðahverfi. Blár reykur rýkur upp í loft í táknrænni vísun í kynjaveislur þar sem kyn barns er opinberað. Í bakgrunni heyrist hlátur þegar myndavélin færist yfir rústirnar.
Atvikið hefur vakið djúpa reiði og þykir sýna skeytingarleysi fyrir mannslífum sem fylgt hefur hernaðaraðgerðum Ísraels í Gaza, þar sem mannúðarkrísa af áður óþekktri stærðargráðu geisar.
Frá 7. október 2023 hefur árás Ísraels á Gaza leitt til dauða yfir að minnsta kosti 52.500 Palestínumanna, þar af meirihluti konur og börn. Talið er að um 92% húsnæðis á svæðinu hafi verið eyðilagt eða stórskemmt. Ísraelski herinn hefur beitt jarðýtum, loftárásum og sprengingum víða á svæðinu, og fjölmörg heimili hafa vísvitandi verið kveikt í.
Alþjóðlegi sakamáladómstóllinn (ICC) hefur gefið út handtökuskipanir á hendur Benjamín Netanyahu, forsætisráðherra Ísraels, og fyrrverandi varnarmálaráðherra Yoav Gallant fyrir stríðsglæpi og glæpi gegn mannkyni. Einnig er Alþjóðadómstóllinn (ICJ) með mál gegn Ísrael þar sem þjóðarmorð eru til skoðunar.
Athugasemdir