Það kemur fram í tilkynningu frá lögreglu að bifreið var stolið frá bílasölu í hverfi 110, en bifreiðin fannst stuttu síðar þar sem henni var ekið um miðborgina. Ökumaður var stöðvaður og handtekinn og vistaður í fangaklefa í þágu rannsóknar málsins.
Þá var ökumaður einn stöðvaður í hverfi 110, grunaður um akstur undir áhrifum fíkniefna. Við leit í bifreiðinni fundust meint fíkniefni, í magni sem var umfram það sem gæti talist sem neysluskammtar. Þá var einnig töluvert af reiðufé á manninum sem grunur leikur á að sé ágóði fíkniefnasölu. Ökumaðurinn er einnig grunaður um að vera hér á landi í ólöglegri dvöl en hann gat ekki framvísað gildum ferðaskilríkjum. Ökumaðurinn var handtekinn og vistaður í fangaklefa í þágu rannsóknar málsins.
Ökumaður stöðvaður eftir að hafa ekið á 185 km/klst á Reykjanesbraut hvar hámarkshraði er 90 km/klst. Ökumaðurinn var sviptur ökuréttindum og á von á sekt.
Þá var annar ökumaður á ofsahraða á Suðurlandsvegi þar sem ökutækinu var ekið á 163 km/klst þar sem hámarkshraði er 90 km/klst. Ökumaðurinn reyndi að komast undan og sinnti ekki stöðvunarmerkjum lögreglu til að byrja með, hann gaf sig þó og stöðvaði á lokum eftir stutta eftirför. Ökumaðurinn er grunaður um akstur undir áhrifum áfengis og var handtekinn í þágu rannsóknar málsins.
Tilkynnt var um að ráðist hafi verið á rútubílstjóra í 101, geranda var haldið niðri af vegfarendum þar til lögregla kom og handtók hann. Gerandi vistaður í fangaklefa þar til hann verður skýrsluhæfur.
Þá voru 12 aðrir ökumenn kærðir fyrir hraðakstur allt frá 118 km/klst upp í 161 km/klst bæði á Suðurlandsvegi og Reykjanesbraut hvar hámarkshraði er 90 km/klst.
Einnig voru tveir ökumenn sektaðir fyrir að aka með nagladekk undir bifreiðinni.
Tilkynnt var um bifreið sem hafði verið ekið á skilti og annað ökutæki í hverfi 108. Þegar lögregla kom á vettvang kom í ljós að ökumaður bifreiðarinnar virtist ekki í ökuhæfu ástandi og var handtekinn, grunaður um akstur undir áhrifum. Ökumaðurinn var fluttur á lögreglustöð og vistaður í fangaklefa í þágu rannsóknar málsins.
Athugasemdir