Þórunn Sveinbjarnardóttir, forseti Alþingis hefur beitt „kjarnorkuákvæðinu“ til þess að binda enda á umræðu um veiðigjaldið og þar með málþóf minnihlutans. Frumvarpið um breytingu á veiðigjöldum sló Íslandsmet í vikunni fyrir lengstu umræðu máls á Alþingi, en nú hefur það verið rætt í yfir um 160 klukkustundir með 3.392 ræðum.
Þingmenn stjórnarandstöðunnar mótmæltu þessu harðlega í morgun. „Þetta er dimmur dagur í sögu Alþingis Íslendinga,“ sagði Guðlaugur Þór Þórðarson, fyrrum ráðherra Sjálfstæðisflokksins, „Ríkisstjórnin vinnur eftir því slagorði „ég á þetta, ég má þetta““.
„[Ákvæðið] á aðeins að vera notað í ítrustu neyð og ég get ekki séð að sú nei sé hér, það er engin þjóðarvá fyrir dyrum hér,“ sagði Guðrún Hafsteinsdóttir, formaður Sjálfstæðisflokksins.
Þessu ákvæði, önnur málsgrein 71. greinar þingskapalaga, hefur örsjaldan verið beitt. Seinast var því beitt árið 1959 og stjórnarandstaðan telur það brjóta gríðarlega gegn málfrelsi þingmanna.
Diljá Mist Einarsdóttir, þingmaður Sjálfstæðisflokksins, ásakaði ríkisstjórn Kristrúnar Frostadóttur um að rjúfa frið til að koma fram skattahækkun. Ásökun sem Vilhjálmur Árnason tók undir „Þetta er sko dimmur dagur í sögu íslensks lýðræðis, kjarnorkuákvæðið notað á skattahækkun,“ sagði hann og þvertók að umræðan um veiðigjöldin hafi tafið þinglok.
Sigmundur Davíð Gunnlaugsson, þingmaður Miðflokksins, ásakaði meirihlutann um að setja upp leikrit og vera með frekjuskap. „Þetta er blekkingastjórn, þetta er spunastjórn sem hefur ekki tekið þátt í umræðum um þetta mikilvæga mál sitt hér nema með því að kasta fram einhverjum fúkyrðum,“ sagði Sigmundur.
Á móti ásakaði Þorgerður Katrín Gunnarsdóttir, utanríkisráðherra Viðreisnar, stjórnarandstöðuna um að hafa ítrekað hafnað ýmsum boðum um málamiðlanir, þá seinast í gær.
Kristrún Frostadóttir sagði minnihlutann ekki hafa neitunarvald og því yrði þau að leyfa þinginu að ljúka þessu máli.
Atkvæðagreiðslu um ákvæðið lauk með 34 atkvæðum með og 20 á móti.
Athugasemdir