Jón Steinsson, agfræðingur við Berkeley-háskóla í Bandaríkjunum, er undrandi á framgöngu stjórnarandstöðunnar á Alþingi, en hún sló met í málþófi í umræðum um „leiðréttingu“ veiðigjalda.
„Það er alveg með ólíkindum að stjórnarandstaðan hafi látið eins og hún lét út af svona litlu máli,“ segir hagfræðingurinn, Jón Steinsson, á Facebook-síðu sinni.
Það sem Jón undrast er að andstaða sé við að ríkið fái svona litlar tekjur af auðlindum. „Nýju lögin um veiðigjöld munu líklega hækka veiðigjöld úr 10 milljörðum króna í 20 milljarða króna, ef ég skil greinargerðina með frumvarpinu rétt. Þetta er þá hækkun sem nemur um 0.65% af tekjum ríkisins,“ segir hann. „Arðgreiðslur Landsvirkjunar eru 25 milljarðar króna. Veiðigjöldin og arðgreiðslur Landsvirkjunar eru þá 45 milljarðar króna á ári, sem eru um 3% af tekjum ríkisins sem koma í formi auðlindagjalda/auðlindahagnaðar. Það er á við útgjöld til vegamála eða hálf fjárlög Landspítalans.“
Þá segir Jón í umræðum um málið að „hugmyndin sé að arðurinn eigi að renna til þjóðarinnar“, „en jafnvel eftir breytinguna er það ekki svo.“
Fiskistofnar við Íslandsstrendur eru „sameign þjóðarinnar“, samkvæmt lögum um fiskveiðar.
Nýleg könnun sýndi að stjórnarandstaðan á Íslandi hefði frá upphafi mælinga ekki verið eins óvinsæl og nú. Ný könnun Maskínu, sem kynnt var í gær, sýndi að 60 prósent svarenda eru óánægð með stjórnarandstöðuna en aðeins 13 prósent ánægð. Óánægjan hefur aldrei mælst meiri og ánægjan aldrei minni.
Ánægja með störf ríkisstjórnarinnar hefur hins vegar aukist. 48 prósent segjast ánægð með störf hennar en 27 prósent óánægð
Athugasemdir