Fyrrverandi formaður Framsóknar, Guðni Ágústsson, er afar áhyggjufullur yfir stöðu flokksins í dag, en hann hefur aldrei mælst með minna fylgi en í síðustu könnunum.
Guðna finnst flokksmenn vera daufir, og vill hann meina að formaður flokksins, Sigurður Ingi Jóhannsson, sé nú að leita sér að útgönguleið:
„Auðvitað er hann að leita sér að útgönguleið, hann veit að það þarf nýjan formann. Hann veit það sjálfur, hvenær hann tekur sína ákvörðun“ sagði Guðni í viðtali í hlaðvarpinu Grjótkastið.
Framsókn heldur miðstjórnarfund í október; Guðni á von á því að hann verði afar fréttnæmur:
„Þannig að ég vorkenni Sigurði mínum Inga að sitja í þessari súpu.“
Guðni segist ekki vita hvernig Framsókn muni leysa úr þessari alvarlegu stöðu sem komin er upp
„Ég veit ekkert um hvað gerist, en þetta er alveg sama staðan eins og þegar ég fór frá – hjá Sigurði Inga, hann þarf að bjarga flokknum. Sigurður Ingi gengur með sóma af vellinum hvenær sem hann fer, ef hann gerir það, þá gengur hann með sóma af vellinum en við þolum enga bið,“ sagði Guðni og bætti því við að hann ráði engu „í þessum efnum en ég hef miklar áhyggjur af flokknum eins og hann er kominn og trúi því að nú setjist hann niður - og sé að gera það, með sínu fólki og finni að kallið er komið.“
Guðni tekur þó fram að hann hafi stutt Sigurð Inga, vin sinn, af heilum hug í síðustu kosningum og einnig í átökunum við Sigmund Davíð Gunnlaugsson, fyrrverandi formann flokksins.
Varðandi ríkisstjórnina segir Guðni að Þorgerður Katrín Gunnarsdóttur utanríkisráðherra ráði förinni og telur hann að flokkur hennar, Viðreisn, sé með öll lykilráðuneytin.
Guðni telur ólíklegt að Kristrún Frostadóttir forsætisráðherra vilji halda fast í stefnu ríkisstjórnarinnar í þá átt að Ísland gangi í Evrópusambandið og telur Guðni að Kristrún sé að undirbúa það að bakka með þjóðaratkvæðagreiðsluna um málið sem rætt hefur verið um og óhætt að segja að sitt sýnist hverjum, enda er málið umdeilt; telur Guðni að Kristrún vilji ekki eyða of mikið af orku sinni í átökin sem innganga í ESB gæti þýtt.
Sveitarstjórnarkosningar verða í vor og segir Guðni það afar mikilvægt fyrir Framsókn og forystufólk hennar að huga vel að endurreisn flokksins, hvort sem það verður Sigurður Ingi í formannssætinu, eða mögulega varaformaðurinn Lilja Dögg Alfreðsdóttir, en í þættinum talaði Guðni um að ákveðin hefð væri í Framsókn fyrir því að varaformaður tæki við af formanni.
En Guðni segist hins vegar ekki eiga von á því að einn öflugasti fyrrverandi ráðherra flokksins, Willum Þór Þórsson, snúi aftur enda sé hann núna komin í lykilstöðu innan íþróttahreyfingarinnar. Hins vegar er það ljóst að margir myndu vilja að Willum Þór myndi taka formannsslaginn og snúa aftur í pólitíkina, en Guðni segir að hvað sem því líður sé það fyrst og síðast félagslegt verkefni Framsóknar að setjast niður og taka yfirvegaða ákvörðun um næstu skref.
Athugasemdir