Tinna Rún Jónasdóttir lögfræðinemi birti myndband á TikTok þar sem hún segir frá niðurlægingu sem hún varð fyrir á árshátíð Lögréttu, félags laganema við Háskólann í Reykjavík þann 1. nóvember síðastliðinn.
Í myndskeiðinu segist Tinna hafa fengið skilaboð frá samnemanda sínum nokkrum dögum fyrir árshátíðina þar sem hún var spurð hvort það mætti sýna eftirfarandi myndband á árshátíðinni. Myndbandið sýndi dreng herma eftir TikTok-myndbandi Tinnu en hún tók vel í þetta. Það sem hún vissi hins vegar ekki var að þetta yrði eina myndbandið sem yrði notað í atriðinu.
„Það sem ég vissi ekki var það að þetta var eina vídeóið sem var sýnt og það var ekkert meira,“ segir Tinna í myndbandinu og heldur áfram: „Þetta var lokaatriðið í dagskránni. Ég var eitthvað svona punchline á 300 manna viðburði fyrir nemendur lagadeildarinnar.“
Tinna segist hissa á að fólk eigi að hlæja af myndbandi sem gerir grín að henni þar sem hún er að vera hún sjálf og hafa gaman.
„Pælið í því að við erum í alvörunni á þeim stað að vera að rakka niður fólk bara fyrir að vera það sjálft,“ segir Tinna ennfremur í myndbandinu. „Mér finnst þetta bara svo ruglað. Ég hélt í alvörunni að á þriðja ári í lögfræðinni myndi ég ekki lenda í svona public humiliation“.
Mannlíf ræddi við Tinnu Rún um málið en hún segist hafa búist við að grínmyndbandið yrði hluti af stærra myndbandi með fullt af gríni en raunin hafi verið sú að aðeins þetta myndband var sýnt.
Segir hún að samkvæmt vinkonum hennar sem voru á árshátíðinni hafi myndbandinu ekki verið tekið vel af gestum hátíðarinnar.
„Samkvæmt vinkonum mínum þá var eiginlega dauðaþögn í salnum þegar myndbandið var sýnt nema að einhverjir úr stjórninni hefðu hlegið, ekki veit ég af hverju. Og margir voru bara stuðaðir. Ég veit alveg um nokkra sem fóru fólki í stjórn Lögréttu og skemmtó og spurðu hvað væri í gangi.“
Tinna segist hafa ekki fengið skilaboð frá formanni Lögréttu fyrr í gær með „einhverskonar afsökunarbeiðni, þrátt fyrir að margir hafi kvartað beint eftir árshátíðina.“ Í afsökunarbeiðninni, sem Mannlíf hefur séð, er tekið fram að vegna tæknilegra vandræða á árshátíðinni og því hafi aðeins verið hægt að sýna seinni helming árshátíðarmyndbandsins.
Í skriflegu svari til Mannlífs segist stjórn Lögréttu vera „miður“ sín vegna „upplifunar“ Tinnu.
„Myndbandið sem um ræðir var hluti af lengra árshátíðarmyndbandi og var á engan hátt eina myndbandið sem var sýnt. Við erum miður okkar að þetta hafi verið hennar upplifun, en við fengum ítrekað og skýrt samþykki fyrir birtingu myndbandsins. Ætlunin var aldrei að láta neinum líða illa og við höfum komið því á framfæri við viðkomandi.“
Þegar Mannlíf bar þessi orð undir Tinnu sagðist hún vera hissa, þar sem að sögn vina hennar sem voru á árshátíðinni, voru nokkrar glærur sýndar með myndbandinu af henni. Tinna sendi svo eftirfarandi svar á Mannlíf:
- Glærukynning er ekki árshátíðarmyndband.
- Ég er ekki meðlimur í Lögréttu og þetta fólk er ekki vinir mínir og þau heilsa mér ekki á göngunum - og ég var ekki á staðnum þegar myndbandið var sýnt.
- Upphaflega stóð til að hafa "feitan kall" á mynbandinu en þau ákváðu að hafa mig í staðinn. Þetta er eitthvað sem ég fékk að vita eftir á, frá manneskju innan úr stjórninni.
- Ég samþykkti ekki að vera með eina videoið heldur að vera partur af árshátíðarvídeói sem var ekki sýnt.
- Þau fóru sérstaklega inn á mína miðla til að finna myndband af mér sem þeim fannst nógu hallærislegt til að birta. Afhverju ég? Afhverju völdu þau mig til að nota í þessu efni?
- Það segir alla söguna að fólk í salnum hafi ekki hlegið og að þau hafi fengið kvartanir en ekki látið mig vita.
- Eina ástæðan fyrir því að ég vissi af þessu var að vinir mínir fóru að tékka á mér af því að þeim var bæði brugðið og misboðið og áttu erfitt með að trúa því að ég hefði samþykkt svona niðurlægjandi efni.
Athugasemdir