Bresk kona, sem var myrt, er sögð hafa ferðast til Bandaríkjanna með þann tilgang að láta karlmann, sem hún kynntist á blætisvefsíðu, drepa sig.
Sonia Exelby, 32 ára, frá Portsmouth, lenti á Gainesville-flugvelli í Flórída 10. október og snéri ekk til baka í heimflugið þremur dögum síðar. Lík hennar fannst í grunnri gröf í skógi í Marion-sýslu, norðvestur af Orlando, viku eftir komuna til Flórída.
Vinur Soníu birti ákall á samfélagsmiðlum og bað hana að koma heim, þar sem óttast var að hún hefði lent „í afar viðkvæmri stöðu“. Í færslunni, sem birt var á Instagram, sagði:„Sonia er mjög viðkvæm manneskja og á erfitt með andlega heilsu sína. Við teljum að hún hafi farið í flug á föstudaginn og komið sér til Tallahassee í Flórída frá Bretlandi. Við teljum að hún hafi skipulagt að hitta einhvern þar og hafi lent í afar viðkvæmri og hættulegri stöðu. Það er í raun allt sem ég get sagt.“
Bresk yfirvöld höfðu samband við Rannsóknarlögreglu Flórída í gegnum INTERPOL, alþjóðlegt samstarf lögreglu. Samkvæmt rannsóknarskýrslum töldu þau að Sonia hafi glímt við andleg veikindi og verið í sjálfsvígshættu.
Talið er að hún hafi ferðast til Flórída til að hitta mann sem að sögn ætlaði að drepa hana á ofbeldisfullan hátt. Rannsóknarlögreglan handtók Dwain Hall, 53 ára, eftir að hægt var að tengja hann við færslur sem voru sagðar hafa verið gerðar með kreditkortum Soniu.
Lögreglan sagði Hall hafa sótt Soniu á flugvöllinn og farið með hana í Airbnb-íbúð í Reddick. Í skýrslum kemur fram að Hall hafi upphaflega sagt lögreglu margar mismunandi sögur áður en hann viðurkenndi að hafa fyrst haft samband við Soniu á blætisvefsíðu fyrir tveimur árum.
Hall sagðist að sögn hafa vitað að hún væri í sjálfsvígshugleiðingum og vildi láta drepa sig. Hann lýsti sjálfum sér sem leiðbeinanda sem ætlaði að hjálpa henni en ekki drepa hana, samkvæmt handtökuskýrslu sem sjónvarpsstöðin TV20 fékk.
Sá grunaði viðurkenndi einnig að hafa ofbeldishneigðir. Hann sagðist hafa stundað kynlíf með henni nokkrum sinnum og tekið upp vídeó af henni sem hann eyddi síðar.
Myndband sem lögregla fékk sýnir Soniu með marbletti á líkama sínum, þar sem Hall á að hafa spurt hana hvers vegna hún væri þarna. Hall þrýsti á hana til að fá samþykki hennar fyrir að verða fyrir meiðingum.
Rannsakendur sögðu að framkoma Soniu í myndbandinu virtist hikandi, hún hafi greinilega verið stressuð og sorgmædd, en kinkað kolli.
Í rannsókninni kom einnig fram skilaboð sem Sonia er sögð hafa sent vinkonu sinni í gegnum Discord 11. október.
Frekari skilaboð frá Soniu sýndu að hún taldi að mistök hefðu verið gerð. Rannsakendur sögðu að skilaboðin „sýndu að Hall réði yfir henni, að hún væri hrædd og að hún hefði gert mistök.“
Hún virðist hafa tjáð sig með eftirsjá á meðan hún var í Airbnb:
„Hann gerði ljóst að það væri engin leið út nema að ég skjóti hann. Ég var að efast í gærkvöldi ... ég hélt að hann myndi gera það fljótt og ekki gefa mér tíma til að hugsa.“
Lík fannst síðar í skógi í Marion-sýslu og fingraför pössuðu við Soniu. Skófla sem fannst í bílskúr Hall reyndist vera með DNA Soniu.
Krufning leiddi í ljós að Sonia hafði verið stungin fjórum sinnum með hnífi. Rannsakendur komust að því að Hall hefði sent pakka til vinar í Ohio eftir dauða Soniu. Yfirvöld í Ohio fundu hníf í pakkanum sem var sagður með blóði á og grunur var um að það væri DNA Soniu.
Dwain Hall hefur verið handtekinn og ákærður fyrir morð af fyrstu gráðu, mannrán, kreditkortasvik og ólögleg notkun á fjarskiptatæki.
Athugasemdir