Atli Þór Fanndal, fyrrverandi framkvæmdastjóri Íslandsdeildar Transparency International, telur að óvinsældir núverandi ríkisstjórnar muni vaxa og dafna en hingað til hafa vinsældir hennar verið miklar. Hafa þó einhverjar haft miklar áhyggjur af verðbólgunni sem mældist 5,2% í nýliðnum janúarmánuði.
„Það hefur verið merkilegt að sjá hvað ríkisstjórnin er á hraðri leið til óvinsælda,“ skrifar Atli á samfélagsmiðla „Sleggja Kristrúnar er meme og meira að segja Rúv er hömlulaust og án ótta í að bera hagkerfið saman við veikan mann með óreglulegan líkamshita. Frambjóðendur allra flokka boða innantóma gröfukarlaskilvirkni og metnaður fyrir betra lífi og meiri velferð er horfinn. Enginn býður okkur til tunglsins lengur en röðin til helvítis verður nú á rúllustiga. Allt er smættað niður í einfaldar lausnir. Vitið til að óvinsældir ríkisstjórnarinnar eiga eftir að aukast hratt núna. Hún er nefnilega löngu hætt að hlusta og þá fer fólk að öskra,“ heldur hann áfram og telur að vonin sé farin.
Ekkert plan og allt öðrum að kenna
„Nú mun taka við tímabil þar sem gagnrýnin mun aukast og fólk mun treysta sér til að gera grín meira. Wintris féll á að vera aulalega en Falson lifði og hélt völdum. Virðing skiptir máli og ríkisstjórnin er hrokafull og hlustar ekki,“ skrifar framkvæmdastjórinn fyrrverandi.
Í athugasemdakerfinu var Atli spurður hvort það væri ekki hreinlega best að kjósa Framsóknarflokkinn.
„Ótrúlegt en satt þá held ég að framsókn hefði ekki farið aðra leið. Þetta er bara pólitíkin í dag. Stjórnmálamenn með ekkert plan en miklar hugmyndir um hvernig allt er öðrum að kenna.
Athugasemdir