Lögregla hafði afskipti af fjölda mála í nótt, meðal annars vegna gruns um fíkniefnabrot, líkamsárásir og umferðarslys víðs vegar á höfuðborgarsvæðinu.
Í Reykjavík var ökumaður stöðvaður vegna gruns um akstur undir áhrifum fíkniefna. Viðkomandi var handtekinn og færður í blóðsýnatöku en látinn laus að henni lokinni. Þá var maður handtekinn í sama hverfi vegna gruns um fíkniefnamisferli. Sá var látinn laus að lokinni skýrslutöku.
Í Hafnarfirði kom í ljós við umferðareftirlit að ökumaður var án gildra ökuréttinda. Málið var afgreitt með sekt.
Tilkynnt var um slys í heimahúsi í Hafnarfirði þar sem barn féll og slasaðist á framhandlegg. Barnið var flutt með sjúkrabifreið á bráðamóttöku til frekari skoðunar. Þá var einnig tilkynnt um umferðarslys í hverfinu, en þar urðu engin slys á fólki og málið var afgreitt á vettvangi.
Í Breiðholti var tilkynnt um líkamsárás og gripdeild í heimahúsi. Sá sem fyrir árásinni varð hlaut minniháttar áverka. Árásaraðili var farinn af vettvangi en vitað er hver hann er. Þá var einnig tilkynnt um að þrjár stúlkur hefðu ráðist á eina í sama hverfi. Þar voru áverkar minniháttar og málið er í rannsókn.
Loks var tilkynnt um umferðarslys í Árbænum. Engin slys urðu á fólki og var málið afgreitt á vettvangi.
Athugasemdir