Rapparinn fyrrverandi, Mohamed Mohdhi, betur þekktur undir listamannsnafninu „Moewgli“, hefur verið handtekinn í Túnis samkvæmt upplýsingum sem sænska ríkissjónvarpið SVT hefur undir höndum.
Hinn 28 ára gamli Mohdhi er talinn næstráðandi í glæpagenginu Foxtrot, beint undir leiðtoganum Rawa Majid.
Lögregla telur hann einn hættulegasta meðlim samtakanna og hefur hann meðal annars grunaðan um að hafa verið drifkraftur að baki morðöldu sem tengdist 15 ára gamalli stúlku í mars síðastliðnum.
Samkvæmt SVT hefur Mohdhi verið í Túnis um lengri tíma en handtakan átt sér stað á föstudag. Sænska lögreglan hefur fengið staðfestingu á handtökunni frá yfirvöldum í Túnis.
Fyrr á þessu ári var Mohdhi settur á lista Europol yfir eftirlýsta glæpamenn sem flokkast sem „high value target“, sem þýðir að hann var í hópi þeirra einstaklinga sem lögregla lagði mesta áherslu á að handsama.
Í Svíþjóð er hann eftirlýstur vegna fjölda alvarlegra ofbeldis- og fíkniefnamála. Hann er meðal annars grunaður um aðild að morði á 15 ára dreng á sushi-veitingastað í Skogås í janúar 2023.
„Okkar mat er að hann sé hátt settur innan Foxtrot og einn af þeim sem hafa stýrt starfseminni. Hann er grunaður um aðild að fjölda alvarlegra ofbeldisbrota,“ sagði ríkissaksóknarinn Ida Arnell áður í samtali við SVT.
Áður en Mohdhi tengdist skipulagðri glæpastarfsemi starfaði hann sem rappari og gaf meðal annars út tónlist með Einár. Samkvæmt heimildum hjálpaði hann einnig til við að byggja upp ímynd Foxtrot-samtakanna í gegnum tónlistarsenuna.
Auk Mohdhi voru fimm aðrir menn með tengsl við Foxtrot handteknir í Túnis, þar á meðal bróðir hans.
Athugasemdir