Ítalía og Frakkland hafa fordæmt harðlega meðferð Ísraels á stuðningsfólki Palestínu sem var um borð í hjálparflota á leið til Gazasvæðisins þegar ísraelski sjóherinn stöðvaði skipin nærri Kýpur.
Ríkin kölluðu sendiherra Ísraels á sinn fund eftir að Itamar Ben-Gvir, þjóðaröryggisráðherra Ísraels, birti myndskeið þar sem hann sást gera lítið úr aðgerðasinnum sem voru í haldi í höfninni í Ashdod.
Viðbrögð Ben-Gvir vöktu svo mikla reiði að jafnvel Benjamin Netanyahu, forsætisráðherra Ísraels, gagnrýndi hann opinberlega og sagði framkomuna „ekki samræmast gildum Ísraels“.
Mannréttindahópur sem gætir hagsmuna þátttakenda í Global Sumud Flotilla hefur krafist tafarlausrar lausnar allra þeirra 430 aðgerðasinna frá rúmlega 40 löndum sem tóku þátt í flotanum.
Flotinn lagði af stað frá Tyrklandi síðastliðinn fimmtudag með táknræna mannúðaraðstoð til Gaza. Aðgerðarsinnar sögðust vilja vekja athygli á erfiðum aðstæðum Palestínumanna á stríðshrjáðu svæðinu, en ísraelsk stjórnvöld kölluðu flotann „áróðursbrellu í þjónustu Hamas“.
Á mánudag hófu vopnaðir sérsveitarmenn ísraelska sjóhersins að stöðva skip flotans á alþjóðlegu hafsvæði vestur af Kýpur, um 460 kílómetra frá ströndum Gaza sem er undir hafnbanni Ísraels.
Skipuleggjendur flotans sökuðu Ísrael um „ólöglega árás á úthafi“ og sögðu hermenn hafa skotið á sex skip, notað vatnsbyssur og viljandi siglt á eitt þeirra.
Ísraelska utanríkisráðuneytið neitaði því að beitt hefði verið skotvopnum og sagði stjórnvöld ekki myndu leyfa brot á „lögmætu hafnbanni“ á Gaza.
Á miðvikudag sagði ísraelska mannréttindasamtökin Adalah að aðgerðasinnarnir væru fluttir nauðugir til Ísraels og vistaðir í höfninni í Ashdod.
Síðar sama dag birti Ben-Gvir myndband á samfélagsmiðlum með textanum „Velkomin til Ísraels“. Þar sést hann heimsækja fangageymslu þar sem aðgerðasinnarnir eru hafðir í haldi.
Í myndbandinu sést kona hrópa „Frelsi fyrir Palestínu“ meðan öryggisverðir ýta henni niður. Einnig sést Ben-Gvir veifa stórum ísraelskum fána yfir hópi aðgerðasinna sem sitja á hnjánum með hendur bundnar fyrir aftan bak.
„Velkomin til Ísraels. Við erum herrarnir hér,“ segir hann á hebresku í myndskeiðinu.
Giorgia Meloni forsætisráðherra Ítalíu kallaði myndbandið „óásættanlegt“ og krafðist afsökunarbeiðni frá Ísraelum.
„Það er óþolandi að þessir mótmælendur, þar á meðal margir ítalskir ríkisborgarar, séu beittir meðferð sem brýtur gegn mannlegri reisn,“ sagði hún.
Jean-Noël Barrot, utanríkisráðherra Frakklands, fordæmdi einnig framkomu Ben-Gvir og sagði að franskir ríkisborgarar sem tóku þátt í flotanum ættu rétt á virðingu og skjótri lausn úr haldi.
Jafnframt gagnrýndi Gideon Saar, utanríkisráðherra Ísraels, ráðherrann opinberlega og sagði hann hafa skaðað orðspor landsins með framferði sínu.
Ben-Gvir svaraði því hins vegar að Ísrael væri „ekki lengur þjóð sem léti vaða yfir sig“.
Netanyahu sagði síðar að Ísrael hefði fullan rétt til að stöðva „ögrandi flota stuðningsmanna Hamas“, en bætti við að framkoma Ben-Gvir gagnvart aðgerðasinnunum hefði verið óásættanleg.
Flotinn sagðist hafa flutt matvæli, ungbarnamjólk og lækningavörur til Gaza þar sem aðstæður eru sagðar afar slæmar þrátt fyrir vopnahlé sem Ísrael og Hamas samþykktu í október síðastliðnum.
Sameinuðu þjóðirnar hafa hins vegar varað við því að fjölskyldur á Gaza búi enn við þröngan húsakost, skort á hreinu vatni og lélega heilbrigðis- og sorphirðuþjónustu, auk þess sem meindýr og nagdýr séu víða vandamál.
Athugasemdir