Donald Trump Bandaríkjaforseti hefur staðfest að harkaleg orðaskipti hafi átt sér stað milli hans og Benjamíns Netanjahú, forsætisráðherra Ísraels, í símtali fyrr í vikunni vegna átakanna í Miðausturlöndum.
Í viðtali sem birt var í New York Post á miðvikudag var Trump spurður út í fréttir um að hann hefði skammað Netanjahú harkalega og meðal annars sagt: „Ertu fokking brjálaður? Hvað ert þú að gera? Ég hjálpaði þér að komast hjá fangelsi.“
Trump staðfesti að hann hefði talað í þessum tón við ísraelska leiðtogann.
„Ég var orðinn dálítið pirraður á þessum stöðugu átökum við Líbanon,“ sagði Trump í viðtalinu. „Ég sagði: „Bibi, við verðum að stoppa þetta.““
Þrátt fyrir orðaskiptin sagði Trump að samband þeirra væri áfram gott. „Við höfum unnið vel saman. Mér líkar mjög vel við Bibi,“ bætti hann við.
Samkvæmt fréttum Axios og ABC News átti Trump að hafa orðið reiður vegna áforma Ísraela um mögulegar loftárásir á Beirút, höfuðborg Líbanons. Hann hafi óttast að slíkar árásir gætu grafið undan friðarviðræðum við Íran um að binda enda á átökin í Miðausturlöndum.
Átökin hófust þegar Ísrael hóf hernaðaraðgerðir gegn Íran í lok febrúar og breiddust síðar út til Líbanons.
Ísraelskir fjölmiðlar hafa hins vegar dregið í efa að samtalið hafi farið fram með þeim hætti sem greint hefur verið frá.
Embættismaður í Hvíta húsinu vísaði AFP-fréttastofunni á færslur Trumps á samfélagsmiðlinum Truth Social frá mánudegi, þar sem hann þakkaði Netanjahú fyrir að hafa samþykkt að draga herlið frá Beirút.
Þá herma fréttir að Íran hafi stöðvað friðarviðræður vegna árása Ísraela á Líbanon.
Athugasemdir