Sífellt hraðari þróun á sviði tækni og gervigreindar hefur fært manngerð vélmenni (e. humanoid robots) nær daglegu lífi fólks. Þótt þessum tækniframförum sé oft fagnað sýna nýleg atvik að öryggisráðstafanir og reglugerðir halda ekki alltaf í við þróunina. Alvarlegt atvik sem átti sér stað á viðburði í Kína á dögunum hefur hleypt nýjum krafti í alþjóðlega umræðu um öryggi, ábyrgð og þörfina á skýrara regluverki í kringum sýningar á öflugum vélbúnaði.
Þann 1. júní síðastliðinn, á alþjóðlegum degi barnsins, stóð grasagarðurinn í Urumqi í Xinjiang-héraði fyrir sérstakri kynningu þar sem manngerð vélmenni voru notuð til að skemmta gestum. Viðburðurinn tók hins vegar óvænta stefnu þegar vélmenni af gerðinni Unitree G1, sem klætt hafði verið í bláa trúðskollu, framkvæmdi kraftmikið 360 gráðu snúningsspark.
Öryggið í kringum vélmennið var af skornum skammti þegar vélmennið sparkaði af miklum þunga í maga ungs drengs sem stóð fremst í hópnum í kringum vélmennið. Í myndbandinu sést þegar drengurinn fær sparkið í magann og engist um af sársauka.
Móðir barnsins staðfesti síðar að hann hefði sloppið við alvarlega áverka en það voru viðbrögð viðburðarhaldara sem vöktu mikla athygli ásamt skorti á fyrirbyggjandi vörnum. Drengurinn og móðir hans kærðu atvikið til lögreglu og voru sýningar vélmennisins stöðvaðar í kjölfarið.
Unitree G1 vélmennið vegur um 35 kíló og liðamót þess geta framleitt yfir 100 Nm (Njútonmetra) snúningsvægi sem jafngildir því að lyfta eða pressa með um það bil 10,2 kg þunga á enda eins metra langrar stangar. Slíkur kraftur, ef honum er beitt á óstýrðan hátt, getur hæglega valdið alvarlegum slysum, beinbrotum eða innvortis áverkum, sérstaklega á börnum. Í ljós kom að vélmenninu var fjarstýrt af starfsmanni viðburðarins og fylgdi það fyrirfram ákveðnu hreyfimynstri án þess að nýta innbyggða skynjara til að nema nálægð við fólk. Þetta undirstrikar að hættan stafar sjaldnast af „sjálfstæðri gervigreind sem snýst gegn mönnum“, heldur miklu frekar af mannlegum mistökum við stjórnun, skorti á áhættumati og vanmati á þeim kröftum sem eru að verki.
Athugasemdir