Rannsóknir sýna að árstíðabundin hármissir stafi oftast af næringarskorti fremur en veðurfari. Sérfræðingar á sviði næringar- og húðlækninga benda á að rétt samsett mataræði sé lykilatriði til að styrkja hársekkina innan frá og vinna gegn hárlosi. Um þetta má fræðast í indverska Vogue.
Indverskt hár þykir einstaklega fallegt á heimsvísu vegna styrks, þykktar og glans, en leyndarmálið á bak við þetta góða hár telst liggja í erfðum og menningarhefðum.
Það er talið að Indverjar búi yfir sterkum erfðafræðilegum þáttum eins og sterkum hársekkjum sem gefa hárinu náttúrulega fyllingu og styrk. Svo er talað um langa og mikla hefð fyrir að huga vel að hárinu. Djúpstæðar hárhefðir eins og að bera reglulega olíu í hársvörðinn er fastur liður í daglegu lífi, en það á að næra hárið frá rótum. Þá er talið mikilvægt að lágmarka alla efnameðhöndlun. Því minni notkun á sterkum gerviefnum og litun því betra verður hárið og helst það þá frekar heilbrigt til lengri tíma.
Árstíðabundið hárlos
Árstíðabundið hárlos, sem margir upplifa sem tímabundið ástand tengt veðurfari, tengist eins og fyrr segir frekar næringarskorti og lífsstílsháttum samkvæmt nýjustu samantekt sérfræðinga. Algengustu orsakaþættirnir eru skortur á járni, próteini, sem og mikilvægum vítamínum og steinefnum á borð við D-vítamín, B12, sink og omega-3 fitusýrum.
Að sögn Abhishree Goyal, næringarfræðings, geta strangir megrunarkúrar, óreglulegur matartími og ofneysla kaffis truflað vaxtarskeið hársins og valdið því að hársekkir fari í dvala. Innan Ayurveda fræðanna er þessu jafnframt lýst sem ójafnvægi í hitabúskap líkamans, þar sem bólguvaldandi fæða og streita getur orðið til þess að hárið þynnist óvenju mikið.
Húðlæknirinn dr. Kiran Sethi leggur áherslu á að fólk leiti lausna í eldhúsinu fremur en að treysta eingöngu á dýr hárserum. Þá nefna sérfræðingar átta fæðutegundir sem taldar eru geta unnið gegn hárlosi:
- Amla (indversk gajaber): Rík af C-vítamíni og andoxunarefnum sem bæta járnupptöku.
- Spínat: Uppspretta járns og fólats sem tryggir súrefnisflæði til hársvarðarins.
- Spíraðar moong-baunir: Innihalda jurtaprótein og bíótín sem styrkja hárþræði frá rót.
- Chía-fræ: Stútfull af omega-3 fitusýrum sem draga úr bólgu og viðhalda raka í hársverðinum.
- Valhnetur: Veita nauðsynleg steinefni og fitusýrur sem viðhalda heilbrigði hársekkjanna.
- Kotasæla (paneer): Hágæða prótein og kalsíum sem styðja við keratínframleiðslu.
- Lax: Öflug samsetning af D-vítamíni, próteini og omega-3 sem eykur þéttleika hárins.
- Karrýlaufduft: Ríkt af A, C og E-vítamínum sem styrkir hársekkina.
Samhliða bættu mataræði ráðleggja sérfræðingar fólki að læra góða streitustjórnun, fá góðan svefn, huga að markvissri umhirðu hársvarðarins og taka reglulega D-vítamín til þess að tryggja hámarksárangur.
Athugasemdir