Sveitarstjórn Rangárþings ytra hefur samþykkt að auglýsa tillögur að breytingum á aðalskipulagi sveitarfélagsins og nýju deiliskipulagi fyrir Gaddstaðaeyju við Hellu.
Með breytingunum er lagt til að núverandi óbyggt svæði í eyjunni verði skilgreint sem verslunar- og þjónustusvæði með það að markmiði að skapa grundvöll fyrir umfangsmikla uppbyggingu í ferðaþjónustu.
Tillögurnar voru samþykktar til auglýsingar á fundi sveitarstjórnar 10. júní síðastliðinn og eru nú til kynningar og umsagnar samkvæmt ákvæðum skipulagslaga. Íbúum, hagaðilum og öðrum sem málið varðar gefst kostur á að kynna sér áformin og senda inn athugasemdir áður en endanleg ákvörðun verður tekin.
Samkvæmt deiliskipulagstillögunni er gert ráð fyrir allt að 160 herbergja hóteli á suðurhluta eyjunnar ásamt fjölbreyttri afþreyingu, þar á meðal baðlóni. Einnig er gert ráð fyrir byggingu allt að 30 smáhýsa til útleigu á norðurhluta eyjunnar. Smáhýsin munu tengjast rekstri hótelsins og mynda hluta af heildaruppbyggingu svæðisins.
Í kynningargögnum kemur fram að verkefnið geti skapað um 80 til 90 störf þegar reksturinn verður kominn í fullan gang, auk afleiddra starfa sem tengjast þjónustu og ferðaþjónustu á svæðinu. Þá er gert ráð fyrir veitingaaðstöðu, þjónusturými fyrir gesti, nýrri aðkomu að eyjunni með brúarsambandi, tengingu við veitukerfi Hellu og lausnum fyrir fráveitu, ofanvatn og brunavarnir. Einnig er til skoðunar að byggður verði bílakjallari til að draga úr umfangi bílastæða á yfirborði.
Að sögn sveitarfélagsins er lögð áhersla á að uppbyggingin taki mið af sérstöðu Gaddstaðaeyjar og því viðkvæma náttúru- og umhverfisgildi sem svæðið býr yfir. Markmiðið sé að þróa ferðamannasvæði sem falli sem best að landslagi og umhverfi eyjunnar.
Skipulagstillögurnar liggja frammi hjá skipulagsfulltrúa Rangárþings ytra á Hellu og á heimasíðu sveitarfélagsins. Frestur til að skila inn athugasemdum rennur út 5. ágúst næstkomandi.
Athugasemdir