Volodymyr Zelensky, forseti Úkraínu, greindi frá því í kvöldávarpi sínu í gær að hann hefði undirritað forsetatilskipun um stofnun sérstakrar herstjórnar innan úkraínska hersins sem muni sjá um langdrægar árásir á skotmörk í Rússlandi.
„Þessi herstjórn verður að nýta 100 prósent af þeim úrræðum sem hún hefur yfir að ráða til að draga enn frekar úr hernaðargetu Rússlands,“ sagði Zelensky.
Hann upplýsti ekki hver myndi stýra nýju herstjórninni, en sagði að sá einstaklingur yrði „eins reyndur og mögulegt er“.
Forsetinn sagði jafnframt að langdrægar árásir Úkraínu hefðu þegar skilað árangri.
„Í dag höfum við séð nýjan árangur af langdrægum aðgerðum okkar gegn Rússlandi. Eldsneytisskorturinn þar fer vaxandi, sem er fyllilega sanngjarnt svar við því að Pútín neitar að binda enda á þetta stríð,“ sagði hann.
Zelensky bætti við að Úkraína hefði lagt fram tillögur um leiðir til að færa frið nær og að þær nytu stuðnings, ekki aðeins meðal bandamanna landsins heldur einnig innan innsta valdahrings Vladimírs Pútíns.
„Fólkið þar skilur hvað er að gerast og að enginn annar kostur sé í stöðunni en friður,“ sagði hann.
Undanfarnar vikur hefur eldsneytiskreppa í Rússlandi farið vaxandi eftir að úkraínskar hersveitir gerðu árásir á olíuhreinsunarstöðvar víða um land. Samkvæmt fréttinni hafa stærstu olíuhreinsunarstöðvar Rússlands allar orðið fyrir árásum.
Donald Trump, forseti Bandaríkjanna, sagði á fundi með Zelensky á hliðarlínu leiðtogafundar NATO í Ankara að auknar árásir Úkraínu á orkuinnviði Rússlands væru „stigmögnun, en stigmögnun sem gæti leitt stríðið til lykta.“
Vladimír Pútín, forseti Rússlands, sagði hins vegar að markmið árásanna væri að skaða rússneskt efnahagslíf og „skapa ótta og kvíða meðal almennings“.
Athugasemdir