Nýsjálenski leikarinn Sam Neill, sem naut heimsfrægðar fyrir hlutverk sín í kvikmyndum á borð við Jurassic Park og The Piano, er látinn, 78 ára að aldri.
Greint var frá andláti hans í yfirlýsingu sem birt var á Instagram-reikningi hans í dag. Ekki kom fram dánarorsök, en Neill hafði nýverið greint frá því að hann væri laus við krabbamein eftir að hafa greinst árið 2022 með þriðja stigs T-frumu eitlakrabbamein.
Í yfirlýsingu fjölskyldunnar segir:
„Það er með mikilli sorg sem fjölskylda Sam Neill greinir frá því að hann hafi látist mánudaginn 13. júlí í Sydney í Ástralíu. Sam var umkringdur fjölskyldu sinni og lést með þeirri reisn sem einkenndi allt hans líf.“
Þar kemur jafnframt fram að andlátið hafi komið fjölskyldunni á óvart þar sem Neill hefði verið laus við krabbamein. Fjölskyldan þakkaði starfsfólki St. Vincent's Private-sjúkrahússins fyrir einstaka umönnun og óskaði eftir næði á þessum erfiða tíma.
Samstarfsfólk, vinir og aðdáendur víðs vegar um heim hafa minnst leikarans eftir að fregnir af andláti hans bárust.
Frá Norður-Írlandi til Hollywood
Sam Neill fæddist árið 1947 í Omagh á Norður-Írlandi undir nafninu Nigel John Dermot Neill. Fjölskylda hans flutti til Nýja-Sjálands árið 1954 og tók hann upp nafnið Sam tólf ára gamall.
Eftir misheppnað laganám sneri hann sér að leiklist og hóf feril sinn í leikhúsi áður en hann sló í gegn í kvikmyndinni Sleeping Dogs árið 1977, fyrstu nýsjálensku myndinni sem var sýnd í bandarískum kvikmyndahúsum.
Á næstu árum lék hann í fjölda þekktra mynda, meðal annars My Brilliant Career, Possession, Omen III, The Hunt for Red October og Ivanhoe.
Ódauðlegur sem Alan Grant
Alþjóðleg frægð hans varð þó hvað mest árið 1993 þegar hann fór með tvö stór hlutverk, annars vegar í Óskarsverðlaunamynd Jane Campion, The Piano, og hins vegar sem fornleifafræðingurinn Dr. Alan Grant í Jurassic Park eftir Steven Spielberg.
Hann sneri síðar aftur í sama hlutverk í Jurassic Park III og Jurassic World Dominion.
Á meira en fimmtíu ára ferli lék Neill í yfir 150 kvikmyndum og sjónvarpsverkefnum, meðal annars Dead Calm, The Jungle Book, Event Horizon, Bicentennial Man, Peter Rabbit, Peaky Blinders, The Tudors og Hunt for the Wilderpeople eftir Taika Waititi.
Hann var einnig meðal þeirra sem komu sterklega til greina í hlutverk James Bond á níunda áratugnum, en Timothy Dalton hlaut hlutverkið að lokum.
Bjó á vínbýli og barðist við krabbamein
Samhliða leikferlinum rak Neill vínbýlið Two Paddocks í Central Otago á Nýja-Sjálandi, þar sem hann ræktaði vín og átti dýr. Hann var þekktur fyrir að deila myndböndum af dýrum sínum á samfélagsmiðlum og nefndi meðal annars hænu eftir Lauru Dern, önd eftir Kylie Minogue og kú eftir Helenu Bonham Carter.
Árið 2023 greindi hann frá því í ævisögu sinni Did I Ever Tell You About This? að hann hefði gengist undir krabbameinsmeðferð eftir greiningu árið áður. Sjúkdómurinn fór í rénun en hann hélt áfram mánaðarlegri meðferð það sem eftir lifði ævinnar.
Í viðtali árið 2023 sagðist hann ekki óttast dauðann.
„Ég er ekki hræddur við að deyja, en það myndi pirra mig. Mig langar að eiga einn eða tvo áratugi í viðbót. Við höfum byggt allar þessar fallegu veröndir, gróðursett ólífutré og kýprustré, og mig langar að sjá þetta allt vaxa. Og ég á yndisleg barnabörn sem mig langar að sjá vaxa úr grasi.“
Sam Neill var sæmdur bresku heiðursorðunni OBE árið 1991 fyrir framlag sitt til leiklistar og hlaut riddaratign á Nýja-Sjálandi árið 2022.
Eftir hann liggja fjögur börn og átta barnabörn.
Athugasemdir