Einbýlishús við Litlabæjarvör 15 á Álftanesi í Garðabæ hefur verið sett á sölu. Um er að ræða 282,2 fermetra eign á sjávarlóð með tvöföldum bílskúr og aukaíbúð. Ásett verð er 219 milljónir króna.
Húsið var reist árið 1990 og stendur á 812,6 fermetra eignarlóð við fáfarna botngötu. Eitt helsta sérkenni þess er lögunin, en hluti hússins minnir á skipsskrokk. Úr stofunni, sem myndar eins konar stafn hússins, er víðáttumikið útsýni yfir Faxaflóa og vestur að Snæfellsjökli.
Við húsið er 43,3 fermetra tvöfaldur bílskúr. Þá fylgir eigninni um 40 fermetra tveggja herbergja aukaíbúð með sérinngangi.
Lóðin liggur að sjó og grjótgarður ver hana fyrir ágangi sjávar. Handan hans er sandfjara og sker.
Samkvæmt sölulýsingu hefur töluvert viðhald farið fram á ytra byrði hússins á undanförnum árum. Meðal annars hefur þakefni verið endurnýjað, farið yfir þakkant og stór gluggi í borðstofu endurnýjaður.
Eignin er sögð henta þeim sem vilja búa í nálægð við sjó og náttúru en jafnframt innan höfuðborgarsvæðisins.
Athugasemdir