Sigurður Ingi Jóhannsson, fyrrverandi forsætisráðherra og núverandi þingmaður Framsóknarflokksins, gagnrýnir ríkisstjórnina harðlega í færslu á samfélagsmiðlum í kjölfar ákvörðunar peningastefnunefndar Seðlabanka Íslands um að hækka stýrivexti um 0,25 prósentustig. Vextirnir standa nú í 8 prósentum.
Í færslu á samfélagsmiðlum segir Sigurður Ingi að ríkisstjórnin hafi ekki gripið til nægjanlegra aðgerða til að ná tökum á verðbólgu. Hann vísar meðal annars til ummæla Kristrúnar Frostadóttur forsætisráðherra í sumar um að ekki kæmi til greina að leggja fram ófjármagnaðan aðgerðapakka vegna stöðunnar í efnahagsmálum.
Sigurður Ingi rifjar í því samhengi upp aðgerðir ríkisstjórnarinnar árið 2024 vegna langtímakjarasamninga og segir þær hafa verið mikilvægan þátt í að stuðla að lækkun verðbólgu og vaxta. Að hans mati hefði sú þróun getað leitt til mildrar lendingar í íslensku efnahagslífi.
Hann gagnrýnir jafnframt Kristrúnu vegna afstöðu hennar í upphafi Covid-faraldursins. Segir hann hana þá, sem óháðan hagfræðing, hafa kallað eftir 50 milljarða króna stuðningi ríkisins við sveitarfélög á höfuðborgarsvæðinu. Sú krafa hafi að hans sögn verið ófjármögnuð.
Sigurður Ingi telur nú stefna í harða lendingu með vaxandi atvinnuleysi, hærri vöxtum, auknum vanskilum og minni hagvexti.
Hann tengir gagnrýnina jafnframt við komandi þjóðaratkvæðagreiðslu og segir ríkisstjórnina beina athyglinni að Evrópusambandinu í stað efnahagsmála. Aðild að ESB eða upptaka evru myndi ekki leysa efnahagsvandann sjálfkrafa.
Sigurður Ingi segist því ætla að greiða atkvæði gegn í þjóðaratkvæðagreiðslunni þann 29. ágúst.
Athugasemdir