Þrír hafa látist í kjölfar hermannaveikifaraldurs í Linz í Austurríki. Alls hafa 26 greinst með sjúkdóminn frá 20. júlí, að því er fram kemur í tilkynningu austurrísku heilbrigðisyfirvaldanna.
Af þeim sem hafa greinst hafa 24 þurft að leggjast inn á sjúkrahús og hafa sumir þeirra verið meðhöndlaðir á gjörgæslu. Tveir þeirra sem smituðust eru búsettir erlendis en höfðu dvalið í Linz áður en veikindin komu fram.
Legionella-bakterían, sem veldur hermannaveiki, hefur fundist í kæliturnum fyrirtækis í Linz. Heilbrigðisyfirvöld segja þó að enn sé ekki hægt að fullyrða að þar sé að finna upptök faraldursins. Rannsókn á smitleiðum stendur yfir.
Hermannsveiki er lungnasýking af völdum legionella-baktería sem finnast meðal annars í vatni. Sjúkdómurinn getur verið allt frá vægum flensulíkum veikindum upp í alvarlega lungnabólgu sem getur reynst banvæn.
Meðal einkenna eru hiti, höfuðverkur, vöðvaverkir, niðurgangur og hósti. Sjúkdómurinn er meðhöndlaður með sýklalyfjum og smitast almennt ekki milli manna.
Faraldrar hermannaveiki hafa meðal annars verið tengdir við illa viðhaldin vatns- og loftræstikerfi, rakatæki, kæliturna og heita potta.
Fyrr í ágúst greindu yfirvöld í Basel í Sviss frá öðrum hermannaveikifaraldri. Þar veiktust 26 manns og einn lést.
Athugasemdir