Bandaríkjaher gerði á sunnudag loftárás á bát á Kyrrahafi sem grunaður var um að tengjast fíkniefnasmygli. Tveir létust í árásinni, að því er suðurherstjórn Bandaríkjanna, SOUTHCOM, greindi frá á mánudag.
Í tilkynningu SOUTHCOM á samfélagsmiðlinum Twitter segir að báturinn hafi verið á siglingu eftir þekktri smyglleið í austanverðu Kyrrahafi. Bandaríkjaher segist hafa haft staðfestar upplýsingar um að skipið væri notað við fíkniefnasmygl.
Myndskeið sem birt var samhliða tilkynningunni sýnir bát á siglingu áður en öflug sprenging verður um borð.
Bandaríkjaher hóf aðgerðina Southern Spear í byrjun september. Donald Trump Bandaríkjaforseti hefur haldið því fram að Bandaríkin eigi í raun í stríði við fíkniefnahópa sem starfa í Rómönsku-Ameríku.
Frá því að aðgerðirnar hófust hafa yfir 200 manns látið lífið í árásum Bandaríkjahers á skip og báta í austanverðu Kyrrahafi og Karíbahafi, samkvæmt samantekt AFP-fréttastofunnar.
Aðgerðirnar hafa sætt gagnrýni, meðal annars vegna þess að bandarísk stjórnvöld hafa ekki lagt fram óyggjandi opinber gögn sem sýna fram á að öll þau skip sem ráðist hefur verið á hafi tengst fíkniefnasmygli.
Lögfræðingar og mannréttindasamtök hafa jafnframt dregið lögmæti árásanna í efa og telja að þær kunni að jafngilda aftökum án dóms og laga.
Athugasemdir