Tveir létust í nautahlaupi í Mexíkó

Tveir lét­ust og ell­efu særð­ust þegar árlegt nauta­hlaup fór fram í bænum Huam­antla í Tlaxcala-ríki í Mexíkó um helg­ina.

Alls var 21 nauti sleppt lausum um götur bæj­ar­ins á svo­nefndri Huam­antlada-hátíð. Mynd­skeið sem dreift hefur verið á sam­fé­lags­miðlum sýna óhugn­an­leg atvik þar sem naut ráð­ast á þátt­tak­endur og áhorf­endur.

Í einu mynd­skeið­inu sést naut ítrekað traðka á karl­manni sem síðar þurfti að draga af göt­unni. Í öðru sést naut ráð­ast á konu og kasta henni til jarðar. Henni tókst þó að kom­ast undan á eigin fótum.

Tveir karl­menn lét­ust af völdum áverka sem þeir hlutu á hátíð­inni. Annar þeirra hefur verið nafn­greindur sem hinn 29 ára gamli Juan Manuel Filomeno Herrera. Ellefu aðrir slös­uð­ust í tengslum við nauta­hlaupið.

Huam­antlada-hátíðin hefur verið haldin árlega frá árinu 1954 og er sögð vera eitt stærsta nauta­hlaup heims. Fyr­ir­mynd hátíð­ar­innar var hið þekkta nauta­hlaup í Pamplona á Spáni.

Banvæn slys hafa verið fátíð á Huam­antlada und­an­farin ár og er þetta í fyrsta sinn um nokk­urt skeið sem dauðs­föll verða á hátíð­inni.