Sjaldgæf tvíhöfða skjaldbaka fannst nýverið í Massachusetts í Bandaríkjunum og er hún nú í umsjá dýralífsmiðstöðvar þar sem fylgst er náið með þroska hennar og heilsu.
Um er að ræða unga skjaldböku af tegundinni diamondback terrapin sem fannst á vernduðu varpsvæði í Wellfleet. Dýrið var flutt á Cape Wildlife Center í Barnstable af starfsfólki Mass Audubon Wellfleet Bay Wildlife Sanctuary.
Skjaldbakan fæddist með tvö höfuð vegna afar sjaldgæfs þroskafráviks sem nefnist bicephaly. Starfsfólk Cape Wildlife Center segir dýralækna miðstöðvarinnar ætla að fylgjast náið með skjaldbökunni og kanna hvernig höfuðin tvö og líkaminn starfa saman.
Sérstaklega verður fylgst með matarlyst, vexti og hegðun skjaldbökunnar á næstu misserum.
Að sögn miðstöðvarinnar er um mjög sjaldgæft fyrirbæri að ræða. Þar hafa aðeins komið upp tvö sambærileg tilfelli á síðustu fimm árum.
Starfsfólkið segir hvert slíkt tilfelli veita sérfræðingum mikilvægt tækifæri til að afla frekari þekkingar á líffærafræði og líkamsstarfsemi dýra sem fæðast með slíkt þroskafrávik.
Ekki liggur enn fyrir hvernig skjaldbökunni muni reiða af til lengri tíma en starfsfólk miðstöðvarinnar mun halda áfram að fylgjast náið með ástandi hennar.
Athugasemdir