Hilmar Garðars Þorsteinsson, varaþingmaður Miðflokksins, gagnrýndi utanríkisstefnu Íslands í umræðum um störf þingsins á Alþingi í dag. Hann sagði stjórnvöld ganga of langt í aðgerðum gagnvart Rússlandi og taka of lítið mið af íslenskum hagsmunum.
„Utanríkisstefna Íslands tekur nú iðulega sáralítið mið af hagsmunum þjóðarinnar og þetta þarf að breytast. Það er kominn tími til að gæta á ný íslenskra hagsmuna fyrst og síðast.“
Segir Ísland hafa notið mikils trausts
Hilmar minnti á að 11. október yrðu fjörutíu ár frá upphafi leiðtogafundar Mikhails Gorbachevs og Ronalds Reagans í Höfða. Hann sagði fundinn hafa skapað traust milli leiðtoganna og Ísland hafa haft mikinn sóma af honum.
„Á þessum tíma nutu Íslendingar mikils trausts á alþjóðavettvangi og áttu í vinsamlegum samskiptum við þjóðir bæði austan tjalds og vestan. Ólíklegt er að Ísland hefði verið valið sem fundarstaður ef svo hefði ekki verið.“
Að sögn Hilmars hefði verið hægt að gagnrýna báða leiðtogana en íslensk stjórnvöld hefðu sýnt þeim virðingu án þess að styðja þar með allar athafnir ríkja þeirra.
„Við höfðum um áratugi átt mikil viðskipti við báðar þessar þjóðir og sýndum leiðtogum þeirra staka virðingu án þess að í því fælist stuðningur við hvað eina sem ríki þeirra höfðu tekið sér fyrir hendur.“
Hann taldi aðra nálgun einkenna utanríkisstefnuna nú.
„Hún virðist vera þannig að ef komið er auga á eitthvert óréttlæti í heiminum er farið af stað og gripið til hörðustu aðgerða sem völ er á, jafnvel umfram aðrar vestrænar þjóðir.“
Gagnrýnir aðgerðir gagnvart Rússlandi
Hilmar hélt því fram að viðskiptastefnan gagnvart Rússlandi hefði kostað Íslendinga milljarða.
„Við höfum hætt öllum viðskiptum við Rússa sem hefur kostað okkur milljarða meðan aðrar þjóðir Evrópu hafa haldið áfram margvíslegum viðskiptum við þá.“
Hann nefndi gjaldþrot Skagans á Akranesi í því samhengi og sakaði Þorgerði Katrínu Gunnarsdóttur, utanríkisráðherra Íslands, um að hafa ákveðið að „slátra milljarðafyrirtækinu Vélfagi vegna lítt sannaðra tengsla við Rússland“.
Þá gagnrýndi Hilmar að starfsemi sendiráðs Íslands í Moskvu hefði verið hætt og gerði athugasemdir við skýringar sem hann vísaði til í ræðunni.
„Ekki bætir um sú eftiráskýring að það hafi ekki síst verið gert vegna kjötbita sem fundist hafi í kæliskáp grænmetisætu starfandi í sendiráðinu.“
Í lok ræðunnar ítrekaði Hilmar ósk sína um breytta forgangsröðun í utanríkismálum.
„Ég lýsi yfir þeirri von minni að svo megi verða hið allra fyrsta og að Íslandi verði ekki flækt í mál sem það getur ekki haft raunhæf áhrif á til gagns.“
Athugasemdir