„Menn gera það ekki í fjandskap við stjórnvöld“

Sig­mundur Davíð Gunn­laugs­son, for­maður Mið­flokks­ins, kall­aði eftir skýrri afstöðu rík­is­stjórn­ar­innar til rann­sókna og mögu­legrar vinnslu olíu og gass í íslenskri lög­sögu á Alþingi í dag. Kristrún Frosta­dóttir for­sæt­is­ráð­herra sagði rík­is­stjórn­ina ekki ætla að banna olíu­leit og að eng­inn fjand­skapur væri af hálfu stjórn­valda í garð slíkra verk­efna.

Kallar eftir skýrri afstöðu stjórnvalda

Sig­mundur Davíð sagði mikla mögu­leika geta falist í olíu- og gaslindum innan íslenskrar lög­sögu og vís­aði meðal ann­ars til mats Við­skipta­ráðs og áhuga fjár­festa. Hann lýsti þó áhyggjum af við­brögðum stjórn­valda.

„Munu íslensk stjórn­völd standa í vegi fyrir því ef menn sýna því áhuga að ráð­ast hér í alvöru­rann­sóknir og von­andi síðan hugs­an­lega vinnslu á olíu og gasi?“ spurði Sig­mundur Davíð.

Kristrún sagði fyrri rík­is­stjórn hafa lagt fram frum­varp um bann við olíu­leit en núver­andi rík­is­stjórn hygð­ist ekki fara þá leið. Rann­sóknir á Dreka­svæð­inu bentu hins vegar til þess að litlar líkur væru á olíu og gasi í vinn­an­legu magni.

„Hér er eng­inn að banna neitt með lögum,“ sagði Kristrún og bætti við að þeir sem teldu sig geta kom­ist að annarri nið­ur­stöðu gætu farið form­legar leiðir og kynnt stjórn­völdum sín sjón­ar­mið.

„Menn gera það ekki í fjandskap við stjórnvöld“

Sig­mundur Davíð sagði það ekki nægja að stjórn­völd bönn­uðu ekki olíu­leit. Fjár­festar þyrftu jafn­framt að geta treyst því að stjórn­völd væru til­búin til sam­starfs.

„En menn gera það ekki í fjand­skap við stjórn­völd sem mæta hér og segja bara: Ja, við teljum ekki ástæðu til að menn séu að þessu,“ sagði Sig­mundur Davíð.

Hann sagði mögu­lega nýt­ingu auð­lind­anna geta skipt sköpum fyrir Ísland til langrar fram­tíðar og óskaði eftir stað­fest­ingu á að áhuga­sömum fjár­festum yrði vel tekið og stjórn­völd myndu ekki reyna að þvæl­ast fyrir þeim.

„Það er enginn fjandskapur“

Kristrún svar­aði því til að ekk­ert væri úti­lokað enda hefði engin rann­sókn­ar­hola verið boruð á svæð­inu.

„Það er eng­inn fjand­skapur í garð þessa máls frá stjórn­völdum,“ sagði Kristrún.

Hún ítrek­aði þó að ára­tuga­langar rann­sóknir sér­fræð­inga bentu til þess að verk­efnið væri ekki arð­bært þar sem olía væri ekki talin finn­ast í vinn­an­legu magni.

For­sæt­is­ráð­herra lauk máli sínu á að ítreka að rík­is­stjórnin hygð­ist ekki banna olíu­leit.

„Ef fólk hefur áhuga á að fara lengra með þetta mál þá þarf það bara að bera sig eftir björg­inni gagn­vart stjórn­völdum hér. Það er bara í góðu lagi mín vegna,“ sagði Kristrún.