Kolbrún Áslaugar Baldursdóttir, þingmaður Flokks fólksins, segir mikilvægt að innflytjendur á Íslandi fái raunveruleg tækifæri til að læra íslensku, nýta menntun sína og reynslu og verða virkir þátttakendur í samfélaginu.
Kolbrún ræddi framkvæmdaáætlun í málefnum innflytjenda fyrir árin 2026–2029 undir liðnum störf þingsins á Alþingi í gær. Áætlunin, sem kemur frá félags- og húsnæðismálaráðherra, er nú til umfjöllunar í velferðarnefnd Alþingis.
Hún sagði málið mikilvægt og löngu tímabært. Markmið áætlunarinnar væri meðal annars að bæta stöðu innflytjenda, efla íslenskunám, auðvelda fólki að nýta menntun sína og starfsreynslu og tryggja betra aðgengi að þjónustu og upplýsingum.
Kolbrún lagði sérstaka áherslu á mikilvægi íslenskukennslu og sagði erfitt að búa í landi án þess að geta tjáð sig á sama tungumáli og aðrir.
„Það skilja allir að það er erfitt að búa á landi þegar maður getur ekki tjáð sig á tungumáli samfélagsins. Það er því grundvallaratriði að gefa fólki raunverulegt tækifæri til að læra íslensku,“ sagði Kolbrún.
Hún sagði íslenskunámið þurfa að vera skýrt afmarkað og aðgengilegt, með áherslu á samtal og dagleg samskipti. Ekki væri hægt að ætlast til þess að fólk lærði tungumálið ef tækifærin til þess væru takmörkuð.
Þá lagði Kolbrún áherslu á að menntun og hæfileikar þeirra sem flytjast til landsins væru metin að verðleikum. Menntun væri fjárfesting og þjóðhagslega hagkvæmt væri að nýta þá þekkingu og reynslu sem innflytjendur byggju yfir.
Í framkvæmdaáætluninni er jafnframt lögð áhersla á rannsóknir, tölfræði og greiningar svo aðgerðir byggi á raunverulegum þörfum. Sérstaklega þurfi að huga að viðkvæmum hópum og tryggja að enginn verði út undan.
Kolbrún sagði áætlunina leggja grunn að markvissum aðgerðum en jafnframt þyrfti að sýna þolinmæði og úthald við framkvæmd þeirra.
„Það er hagur okkar allra að fólk sem hér sest að fái tækifæri til að læra tungumálið, nýta hæfileika sína og verða virkir þátttakendur í íslensku samfélagi,“ sagði Kolbrún.
Athugasemdir