Isavia staðfestir að flugvél með skráningarnúmerið N62FF hafi lent á Keflavíkurflugvelli aðfaranótt 10. september síðastliðins og farið aftur tæpum 70 mínútum síðar. Isavia segist hins vegar ekki búa yfir upplýsingum um tilgang flugsins.
Þetta kemur fram í svari Isavia við fyrirspurn Mannlífs vegna fullyrðinga BDS Íslands um að flugvélar tengdar brottvísunaraðgerðum bandarískra yfirvalda hafi tekið eldsneyti á Keflavíkurflugvelli.
Í svari Isavia segir að vél með skráningarnúmerið N62FF lent þar klukkan 00.38 og farið aftur klukkan 01.47.
„Isavia ohf. býr ekki yfir upplýsingum um það sem spurt er um, svo sem hver tilgangur flugsins var,“ segir í svarinu.
BDS Ísland tengir vélina við brottvísanir
BDS Ísland hefur birt myndskeið á samfélagsmiðlum þar sem samtökin halda því fram að fjögur flug tengd brottvísunaraðgerðum bandarísku innflytjenda- og tollgæslunnar, ICE, hafi tekið eldsneyti á Keflavíkurflugvelli á þessu ári.
Samkvæmt upplýsingum samtakanna áttu flugin sér stað 27. apríl, 29. júlí, 1. ágúst og 10. september. Þau segja vélarnar hafa verið reknar af fyrirtækinu Journey Aviation og tengjast brottvísunum frá Bandaríkjunum.
BDS Ísland hefur sérstaklega bent á vélina N62FF, sem samtökin segja hafa tekið eldsneyti á Keflavíkurflugvelli 10. september.
Samtökin hafa einnig vísað til umfjöllunar The Guardian og +972 Magazine um flug sem tengjast brottvísun Palestínumanna frá Bandaríkjunum. Samkvæmt þeirri umfjöllun voru Palestínumenn sem bandarísk yfirvöld höfðu handtekið fluttir úr landi með flugvél sem tengdist Journey Aviation.
Svara beðið frá dómsmálaráðuneytinu
Svar Isavia staðfestir komu vélarinnar N62FF til Keflavíkurflugvallar aðfaranótt 10. september, en veitir ekki upplýsingar um tilgang ferðarinnar eða hvort flugið tengdist brottvísunaraðgerðum bandarískra yfirvalda.
BDS Ísland hefur gagnrýnt íslenska fjölmiðla fyrir að fjalla ekki um málið og kallað eftir því að íslensk stjórnvöld rannsaki flugin og kanni hvort notkun Keflavíkurflugvallar í þessum tilgangi samræmist íslenskum lögum og alþjóðlegum skuldbindingum Íslands.
Í fyrri umfjöllun Mannlífs kom fram að fyrirspurnir hefðu verið sendar til Isavia og utanríkisráðuneytisins vegna málsins. Svar Isavia liggur nú fyrir, en það skýrir ekki hvort eða hvernig flugið tengdist þeim brottvísunum sem BDS Ísland hefur fjallað um. Utanríkisráðuneytið benti Mannlífi á að fyrirspurnirnar ættu frekar að sendast á dómsmálaráðuneytið, og hafa þær því verið sendar á téð ráðuneyti.
Spurningar Mannlífs til dómsmálaráðuneytisins eru eftirfarandi þó svar sé komið frá ISAVIA við fyrstu spurningunni:
- Getur dómsmálaráðuneytið staðfest að einkaþota með skráningarnúmerið N62FF hafi tekið eldsneyti á Keflavíkurflugvelli 10. september í tengslum við brottvísanir Palestínumanna frá Bandaríkjunum?
- BDS Ísland segir að þrjú önnur sambærileg flug hafi tekið eldsneyti hér á landi í apríl, júlí og ágúst, þó ekki endilega með Palestínumenn innanborðs. Hefur ráðuneytið kannað þau flug?
- Ef þessar upplýsingar reynast réttar, telurðu að íslensk stjórnvöld beri ábyrgð á að kanna hvort íslensk aðstaða hafi verið nýtt til að greiða fyrir brottvísunum sem kunna að brjóta gegn alþjóðalögum?
- Hefur ráðuneytið óskað eftir skýringum frá bandarískum stjórnvöldum eða Isavia?
- Hvaða heimildir hafa íslensk stjórnvöld til að koma í veg fyrir að flugvellir hér á landi séu nýttir í þessum tilgangi?
Athugasemdir