Indónesísk lögregla hefur handtekið 13 manns í tengslum við alvarlegt mál þar sem grunur leikur á um ofbeldi gegn ungum börnum á dagvistunarheimili í Yogyakarta á eyjunni Java. Málið vakti mikla reiði meðal almennings eftir að myndbandsupptökur úr öryggismyndavélum fóru í dreifingu á samfélagsmiðlum.
Á upptökunum má sjá börn, flest yngri en tveggja ára, liggja á gólfi klædd einungis bleyjum, með hendur og fætur bundna. Lögregla hefur staðfest að myndefnið sé ósvikið. Þá fundust einnig um 20 börn saman í mjög litlu herbergi.
Meðal hinna handteknu eru ellefu starfsmenn, auk skólastjóra og stjórnanda stofnunarinnar sem rak dagvistunina. Þau eiga yfir höfði sér ákærur fyrir vanrækslu og mögulega fleiri brot eftir því sem rannsókn vindur fram.
Grunaðir hafa borið því við að börnin hafi verið bundin til að koma í veg fyrir truflun, þar sem mannekla hafi verið viðvarandi. Foreldrar barna sem dvöldu á staðnum hafa lýst yfir miklu áfalli og reiði.
Dagvistunin hefur verið lokuð, en talið er að meira en helmingur þeirra um 100 barna sem þar dvöldu hafi sætt illri meðferð. Málið er nú til frekari rannsóknar.
