Fyrrverandi rannsóknarlögreglumaðurinn, glæpabókahöfundurinn, afbrotafræðingurinn og njósnari Björgólfs Thors Björgólfssonar, Jón Óttar Ólafsson, var aðalleikarinn í umfjöllun Kveiks um gagnaleka, sem byggði á leyniupptökum Jóns Óttars sjálfs.
Jón Óttar hefur verið sýnilegur í miðborg Reykjavíkur, þar sem hann býr. Ein slík nærvera átti sér stað á veitingastað í miðbænum fyrir örfáum vikum. Þar sat einn fremsti grínisti Íslands, og nýbakaður bæjarlistamaður Seltjarnarness, sjálfur Ari Eldjárn, einn við borð á þéttsetnum stað í hádeginu, hinu sögufræga Horni. Ari tók upp á því, út frá kunnri kurteisi hans og forvitni, að bjóða aðvífandi gestum að deila borðinu, svo þeir þyrftu ekki frá að hverfa.
Svo fór að óvæntur sessunautur Ara varð Jón Óttar Ólafsson.
„Nú, ert þú hann?“ heyrðist Ari spyrja eftir fyrstu kynnin.
Ari hélt síðan svokallað „tilraunauppistand“ nokkru síðar, sem er liður í undirbúningi fyrir komandi verkefni hans. Líklegt má telja að Ari hafi verið í reglubundnum mannlífsrannsóknum og sætt lagi þegar hann átti sæti sem ekki var upptekið.
Hvort eitthvað annað var upptekið í þetta sinn verður að koma í ljós.
