Karlmaður hefur verið dæmdur í 14 mánaða fangelsi í Héraðsdómi Reykjaness fyrir 88 þjófnaðarbrot og eina tilraun til þjófnaðar. Brotin voru framin á tímabilinu frá desember 2024 til júlí 2026 og nam samanlagt verðmæti munanna rúmlega 3,5 milljónum króna.
Maðurinn játaði fyrir dómi öll brotin sem ákæruvaldið hélt til streitu. Þjófnaðirnir voru fjölbreyttir en stór hluti þeirra sneri að matvöru úr verslunum á höfuðborgarsvæðinu. Meðal þess sem maðurinn stal voru mikið magn af kjúklingabringum, nautakjöti, lambakjöti, ostum, kaffi, orkudrykkjum og öðrum matvörum.
Þá stal hann einnig raftækjum, ilmvötnum, fatnaði, verkfærum, húðvörum, vítamínum og Lego-kössum. Í einu tilviki stal hann tveimur jökkum að verðmæti 196 þúsund króna og í öðru húðvörum að verðmæti rúmlega 238 þúsund króna. Þá var hann sakfelldur fyrir að hafa reynt að stela verkfærum að verðmæti rúmlega 159 þúsund króna en starfsmenn stöðvuðu hann áður en hann yfirgaf verslunina.
Maðurinn átti að baki nokkurn sakaferil og hafði áður meðal annars hlotið fangelsisdóma og verið sviptur ökurétti ævilangt. Með hluta brotanna rauf hann skilorð eldri dóms og var fimm mánaða skilorðsbundin fangelsisrefsing því tekin upp.
Við ákvörðun refsingar horfði dómurinn til greiðrar játningar mannsins en einnig til fjölda brotanna, þess hversu lengi þau stóðu yfir og heildarverðmætis þýfisins.
Niðurstaðan var 14 mánaða fangelsi. Manninum var jafnframt gert að greiða 800 þúsund krónur í málsvarnarlaun verjanda síns.
