Miðstjórn Alþýðusambands Íslands (ASÍ) hefur samþykkt ályktun þar sem hún lýsir „þungum áhyggjum af atvinnuástandi á Húsavík og nágrenni vegna lokunar kísilmálmverksmiðju PCC á Bakka.“
Í ályktuninni hvetur miðstjórn stjórnvöld til að grípa tafarlaust til aðgerða svo unnt verði að hefja rekstur verksmiðjunnar á ný. „Í því efni skiptir mestu að rekstrarumhverfi PCC verði bætt með beinskeyttum aðgerðum,“ segir í ályktuninni.
Miðstjórn ASÍ bendir á að stöðvun reksturs PCC megi einkum rekja til „erfiðleika á mörkuðum og röskunar þeirra vegna tollastríðs.“ Þá segir einnig að samkeppnisstaða fyrirtækisins gagnvart Kína sé erfið „þar sem verkafólk sem engra réttinda nýtur og býr við ömurleg launakjör og aðbúnað framleiðir ódýran kísilmálm í miklu magni.“
Samkvæmt ályktuninni tengjast hátt í 200 störf beint starfsemi PCC, að meðtöldum undirverktökum, en „afleidd störf af starfseminni skipta hundruðum.“
„Lokun verksmiðjunnar, sem er ein hin fullkomnasta í heiminum, er mikið áfall fyrir atvinnulíf á Norðurlandi og alvarlegra áhrifa er þegar tekið að gæta,“ segir enn fremur í ályktun ASÍ.
Að lokum ítrekar miðstjórn ákall sitt til stjórnvalda um tafarlaus viðbrögð. „Gífurlegir hagsmunir eru í húfi, jafnt fyrir atvinnulíf á Norðurlandi sem þjóðarbúið sjálft,“ segir í ályktuninni.
