Jón Þór Hauksson, fyrrverandi þjálfari Stjörnunnar, segir dvöl sína hjá félaginu hafa verið „algjört fíaskó“ og að hann hafi nánast frá fyrsta degi fundið að hann væri ekki velkominn í Garðabæ.

Jón Þór var látinn fara á dögunum eftir aðeins 68 daga í starfi. Hann tók við liðinu eftir brottrekstur Jökuls Elísabetarsonar fyrr í sumar og varð annar þjálfari Stjörnunnar sem lætur af störfum á tímabilinu.

Í viðtali við Gunnlaug Jónsson á Sportrásinni á Rás 2 gagnrýndi Jón Þór aðdraganda ráðningarinnar, umgjörð liðsins og andrúmsloftið innan félagsins. Hann sagðist fljótt hafa fundið fyrir andstöðu og að „rauð flögg“ hefðu komið fram þegar lítill áhugi var sýndur á að styrkja þjálfarateymið.

Jón Þór ræddi einnig langvarandi magavandamál sem versni undir miklu álagi. Hann gagnrýndi harðlega sögusagnir um fjarvistir sínar og sagði skammarlegt að heiður hans og heilindi hefðu verið dregin í efa.

Hann kvaðst ekki enn vita nákvæmlega hvers vegna honum var sagt upp en telur vandann hjá Stjörnunni stærri en svo.

Hann ætlar nú að einbeita sér að heilsunni og fjölskyldunni.