Breski milljarðamæringurinn Richard Branson fer fögrum orðum um Höllu Tómasdóttur, forseta Íslands, í nýrri færslu á samfélagsmiðlum. Þar segir hann að heimurinn sé betur settur með Höllu í embætti forseta, þótt The B Team hafi misst einn besta framkvæmdastjóra sem samtökin hafi haft. Þau virðast hafa hist á dögunum á Íslandi en með færslunni birtir Branson ljósmyndir sem teknar voru nýlega. Skrifar hann í upphafi færslunnar:
„Svo dásamlegt að hitta vinkonu mína, fyrrverandi samstarfskonu og forseta Íslands, Höllu Tómasdóttur.“
Branson rifjar upp að Halla hafi haft samband við sig þegar hún gegndi starfi forstjóra The B Team, sem hann var meðal stofnenda að, og beðið um mánaðarleyfi til að bjóða sig fram til forseta Íslands. Hún hafi þá aðeins mælst með tvö prósent fylgi.
„Ég sagði í gríni: „Gangi þér vel – þá sé ég þig eftir mánuð!““ skrifar Branson og bætir við að hann hafi haft rangt fyrir sér. Halla hafi unnið kosningarnar og dafnað í embætti. „Þótt við höfum misst einn besta forstjóra sem við höfum nokkru sinni haft er heimurinn betur settur með Höllu sem forseta,“ segir hann.
Tengsl Branson við Epstein
Branson hefur á undanförnum árum þó einnig verið í sviðsljósinu vegna fyrri samskipta sinna við Jeffrey Epstein. Nafn hans kom fyrir í þónokkrum gögnum sem birt voru úr Epstein-rannsókninni og sýndu meðal annars tölvupóstaskipti þeirra frá árinu 2013 en þar má sjá að nokkuð hlýtt var á milli þeirra.
Í þeim tölvupósti leggur Branson til hvernig Bill Gates gæti varið Epstein opinberlega. Hann stingur upp á að Gates segði að Epstein hefði verið „frábær ráðgjafi“, að hann hefði „misstigið sig“ fyrir mörgum árum með því að sofa hjá 17 og hálfs árs konu, hefði tekið út refsingu sína og lært af mistökunum. Þá skrifar Branson einnig að ekkert væri athugavert við að Epstein, sem einhleypur maður, hefði dálæti á konum.
Í sama pósti býður Branson Epstein að heimsækja sig á ný og skrifar meðal annars: „Það var virkilega gaman að sjá þig í gær. Strákarnir í vatnaíþróttunum geta ekki hætt að tala um heimsóknina! Komdu endilega aftur þegar þú átt leið um. Svo lengi sem þú kemur með kvennabúrið þitt!“
Virgin Group hefur ítrekað hafnað því að Branson hafi átt náin tengsl við Epstein. Fyrirtækið segir samskiptin hafa verið takmörkuð við fáein tækifæri í viðskipta- og góðgerðarsamhengi og að Branson hafi slitið öllum tengslum við Epstein eftir að áreiðanleikakönnun vegna fyrirhugaðs styrks leiddi í ljós alvarlegar ásakanir á hendur honum. Þá hefur Branson lýst gjörðum Epsteins sem „viðurstyggilegum“ og sagst styðja rétt fórnarlamba hans til réttlætis. Þá sagði í tilkynningu frá Branson að hann hafi átt við þrjár fullorðnar konur úr starfsteymi Epsteins þegar hann talaði um kvennabúrið.
