Héraðsdómur Reykjavíkur hefur dæmt konu í 30 daga skilorðsbundið fangelsi fyrir að brjóta gegn nálgunarbanni með því að senda fyrrverandi eiginmanni sínum sex tölvupósta sumarið 2023.
Konan var upphaflega ákærð fyrir umsáturseinelti, stórfelldar ærumeiðingar og brot á nálgunarbanni. Samkvæmt ákæru átti hún meðal annars að hafa sent manninum 222 óvelkomna tölvupósta á tæplega þriggja mánaða tímabili, tekið yfir Facebook-aðgang hans og birt þar fjölda meiðandi ummæla auk þess að senda skilaboð til vina hans og fjölskyldu í hans nafni.
Dómurinn taldi hins vegar að ákæran væri ekki nægilega skýr að því er varðaði meint umsáturseinelti og ærumeiðingar. Ekki hefði verið tilgreint nákvæmlega hvaða ummæli eða skilaboð hefðu átt að fela í sér stórfelldar ærumeiðingar eða hvernig þau hefðu verið til þess fallin að valda ótta eða kvíða. Af þeim sökum var þeim ákærum vísað frá.
Sannað þótti að konan hefði sent manninum sex tölvupósta á tímabilinu 22. til 27. júlí 2023 þrátt fyrir að lögreglustjóri hefði sett henni nálgunarbann mánuði áður. Með því hefði hún brotið gegn ákvörðun um bann við að hafa samband við manninn.
Við ákvörðun refsingar var litið til þess að konan hafði ekki áður hlotið dóm og að tafir hefðu orðið á rannsókn málsins. Refsingin var því ákveðin 30 daga fangelsi en fullnustu hennar frestað skilorðsbundið til tveggja ára.
Jafnframt var konunni gert að greiða brotaþolanum 150 þúsund krónur í miskabætur og 883.500 krónur í málskostnað. Þá var henni gert að greiða hluta af verjendalaunum sínum en annar sakarkostnaður fellur á ríkissjóð.
