Glæsilegt einbýlishús við Eikarás 5 er meðal dýrustu íbúðareigna á Íslandi, en eignin hefur verið á sölu, með hléum, síðan sumarið 2024 án þess að verðið hafi tekið breytingum.
Húsið er auglýst á 350 milljónir króna og hefur vakið athygli fyrir stærð, staðsetningu og mikinn lúxus.
Eignin stendur á eftirsóttum og barnvænum stað neðan götu með góðu útsýni. Stutt er í skóla, leikskóla og helstu þjónustu sem gerir staðsetninguna sérstaklega hentuga fyrir fjölskyldufólk.
Húsið var byggt árið 2003 og býður upp á fjölbreytt og rúmgott skipulag. Þar eru fimm svefnherbergi með möguleika á að fjölga þeim enn frekar. Í húsinu er einnig rúmgóð hjónasvíta með fataherbergi og sér baðherbergi. Alls eru fjögur baðherbergi í eigninni.
Mikil áhersla hefur verið lögð á þægindi og afþreyingu innan heimilisins. Í stofu er arinn og á veröndinni er heitur pottur. Garðurinn er sérhannaður með leiktækjum fyrir börn. Auk þess er að finna sauna, líkamsræktaraðstöðu, stórt leikherbergi, skrifstofu og innbyggðan bílskúr.
