Einbýlishús við Langholtsveg 143 í Reykjavík er komið á fasteignamarkað. Eignin er á tveimur hæðum, með aukaíbúð á neðri hæð, bílskúr og stórum garði og kostar 159.000.000 krónur.

Húsið er skráð 184,3 fermetrar en auk þess eru 82,1 fermetrar skráðir sem sameign. Raunstærð hússins er því sögð um 266,4 fermetrar, þar af er 24,5 fermetra bílskúr. Húsið stendur á 750 fermetra lóð.

Aðalhæð hússins er skráð 112,4 fermetrar en hefur samkvæmt fasteignalýsingu verið stækkuð um átta fermetra. Þar eru forstofa, stofa, borðstofa, eldhús, baðherbergi og tvö svefnherbergi, en þau voru áður þrjú. Þá er aukainngangur við eldhúsið.

Á neðri hæð er aukaíbúð sem er skráð 47,4 fermetrar en sögð vera um 70 fermetrar að stærð. Þar eru meðal annars stofa, eldhús, baðherbergi og tvö svefnherbergi. Á hæðinni eru jafnframt sameiginlegt þvottahús, þurrkherbergi, gangur og geymsla. Neðri hæðin er í heild um 129,5 fermetrar. Stigi liggur á milli hæða en aukaíbúðin er einnig með sérinngangi.

Garðurinn við húsið er stór og þar er meðal annars sólpallur með heitum potti. Annar stór pallur er við húsið og þar er kalt gróðurhús.

Fram kemur í fasteignalýsingu að húsinu hafi verið vel við haldið í gegnum árin og það endurnýjað að verulegu leyti. Eignin stendur við Langholtsveg, á grónu og vinsælu íbúðasvæði í Reykjavík þar sem stutt er í helstu þjónustu.