Ráðning Sjálfstæðisflokksins á nýjum framkvæmdastjóra er til marks um frjálslyndi og framsækni í flokknum. Sjálfstæðisflokkurinn hefur löngum verið klofinn mitt á milli frjálslynda armsins, sem að hluta klauf sig út í Viðreisn, og íhaldssama armsins, sem hefur misst fylgi til Miðflokksins. Margir hefðu haldið að íhaldssamari armurinn hafi sigrað þegar Áslaug Arna Sigurbjörnsdóttir laut í lægra haldi í formannskosningunni í mars.
Áhrif Guðrúnar Hafsteinsdóttur, nýs formanns, birtast í því að nú hefur kona verið ráðin framkvæmdastjóri í annað sinn í þetta virðingarembætti íslensks samfélags, sem Kjartan Gunnarsson fyllti í 26 ár. Björg Ásta Þórðardóttir tekur við af Þórði Þórarinssyni, sem verið hefur framkvæmdastjóri síðustu 11 ár. Björg hefur verið formaður MS-félagsins og gegnt ýmsum stjórnarstörfum. Hún býr með listakonunni Ósk Laufeyju Breiðfjörð í Vogum á Vatnsleysuströnd og eiga þær þrjú börn.
Það sem hefur kannski síður breyst er að tengslanetið er nýtt til hins ítrasta. Björg var nefnilega aðstoðarmaður dómsmálaráðherra, sem einmitt var Guðrún Hafsteinsdóttir, núverandi formaður. Þar með fetar Guðrún í fótspor Geirs H. Haarde sem fékk aðstoðarmann sinn í framkvæmdastjórastöðu flokksins 2009. Því er ekki leitað langt yfir skammt en um leið eru tök Guðrúnar á flokknum treyst.
