Íslenski landsliðsmaðurinn Albert Guðmundsson gæti yfirgefið Fiorentina áður en félagaskiptaglugganum á Ítalíu verður lokað annað kvöld. Lazio hefur sýnt honum mikinn áhuga og viðræður félaganna eru sagðar komnar vel á veg.

Ítalski félagaskiptasérfræðingurinn Alfredo Pedullà greinir frá því að Albert sé opinn fyrir félagaskiptum og vilji helst ganga til liðs við Lazio. Rætt er um lánssamning þar sem Lazio myndi greiða eina til tvær milljónir evra fyrir lánið og fá kauprétt á leikmanninum fyrir um 15 milljónir evra til viðbótar.

Lazio er þó ekki eina félagið sem hefur áhuga á Albert. Bologna hefur einnig verið nefnt til sögunnar og gæti mögulega reynt að fá íslenska landsliðsmanninn til liðs við sig áður en glugganum verður lokað.

Ítalskir miðlar telja þó Lazio standa vel að vígi í kapphlaupinu, enda hafi Albert sjálfur sett félagið í forgang.