Morgunblaðið hefur nú afhjúpað með rannsókn sinni að utanríkisráðuneytið hafi sent Ríkisútvarpinu óbirta skýrslu, eða „innanhússkjal“, án þess að lagaleg skylda hafi verið til.
Um var að ræða skýrsla sem afhjúpaði vandræðalega gleymsku eða óheilindi Guðlaugs Þórs Þórðarsonar, þingmanns Sjálfstæðisflokksins, og unnin var í hans ráðherratíð. Þar kom fram að Ísland hefði aldrei formlega slitið viðræðum um aðild að Evrópusambandinu, ólíkt því sem Guðlaugur hefur sagt nýverið í umræðum um endurnýjaðar aðildarviðræður. Skýrslunni, með rituðum inngangi Guðlaugs, hafði verið stungið ofan í skúffu.
Morgunblaðið fylgir eftir rannsókn sinni með viðtali Hermanns Nökkva Gunnarssonar, blaðamanns Morgunblaðsins, við Hjört J. Guðmundsson alþjóðastjórnmálafræðing, sem segir að Þorgerður Katrín Gunnarsdóttir utanríkisráðherra hafi eflaust vitað af veitingu upplýsinganna og án vafa borið ábyrgð á henni. Undirliggjandi er að þannig hafi mögulega verið um að ræða pólitískt plott, þar sem tilvist skýrslunnar hafi verið lekið til Ríkisútvarpsmanna og gengið lengra en áður í upplýsingagjöf.
Boðleiðir ríkisstjórnarinnar inn á Ríkisútvarpið eru ekki langar, en Sigmar Guðmundsson, þingmaður einn allra nánasti bandamaður Þorgerðar Katrínar, starfaði þar um árabil.
Ljóst er að það er af sem áður var að upplýsingar láku frá stjórnvöldum til Morgunblaðsins, þegar þurfa þótti, heldur er það nú ríkismiðillinn. Vekur þetta eðlilega gremju á Morgunblaðinu, sem hefur misst spón úr aski sínum. Margir kynnu að hafa áhyggjur af tengslum framkvæmdavalds og fjölmiðla. Enn aðrir telja jákvætt að veita upplýsingar án þess að lagaleg skylda sé til, þótt það megi misnota.
Blaðamaður Morgunblaðsins sem afhjúpaði málið lenti í kröppum dansi í vetur þegar hann hafði sótt landsfund Sjálfstæðisflokksins og varð fyrir því á barnum Pedersen-svítunni að kýla annan landsfundargest sem studdi Áslaugu Örnu Sigurbjörnsdóttur í formannskjörinu, en sjálfur studdi hann Guðrúnu Hafsteinsdóttur. Hermann Nökkvi er ekki bara blaðamaður heldur framkvæmdastjóri Sambands ungra Sjálfstæðismanna.
Viðmælandi hans og álitsgjafi, Hjörtur J. Guðmundsson, er reyndar fyrrverandi blaðamaður Morgunblaðsins. Hann er síðan í utanríkismálanefnd Sjálfstæðisflokksins.
Þykir þessi atburðarás einkennandi fyrir íslensk stjórnmál og fjölmiðla, þar sem mannfæð og þéttofið tengslanet mynda flétturnar.
