Það eru spennandi tímar fram undan hjá knattspyrnumanninum Ísaki Bergmann Jóhannessyni og Agnesi Perlu Sigurðardóttur en þau eiga von á sínu fyrsta barni.

Parið deildi gleðitíðindunum með fylgjendum sínum á Instagram.

„Við verðum þrjú í byrjun apríl,“ skrifuðu þau við fallega mynd þar sem Ísak heldur á sónarmyndum. Þau fögnuðu fimm ára sambandsafmæli í apríl og í sumar fór Ísak á skeljarnar við ströndina á Akranesi.

Ísak leikur með þýska úrvalsdeildarliðinu FC Köln og hefur verið atvinnumaður frá 16 ára aldri. Agnes Perla er heldur enginn nýgræðingur í íþróttunum en hún lék körfubolta með Keflavík og yngri landsliðum Íslands.