Í dag eru það ekki margir sem mótmæla því að Ísrael stundi þjóðarmorð gegn Palestínumönnum og nú hafa fremstu þjóðarmorðsfræðimenn heimsins sagt opinberlega að Ísrael sé fremja þjóðarmorð.
Nú þegar helför Ísraela gegn íbúum Palestínu er enn á ný að ná nýjum hæðum hafa Alþjóðasamtök þjóðarmorðsfræðimanna lýst því yfir og ályktað um að stefna sem og aðgerðir Ísraels á Gaza uppfylli lagalega skilyrði þjóðarmorðs, samkvæmt sáttmála Sameinuðu þjóðanna.
Hinn tæknivæddi og vel þjálfaði her Ísraela heldur morðæði sínum áfram í áköfum hernaði í Gaza-borg, sem sami her skilgreindi sem vígvöll fyrir helgi þótt þar sé eingöngu að finna rústir og vopnlaust fólk sem er aðframkomið af hungri og hryllilegum sjúkdómum því tengdu.
Í helför Ísraels gegn vopnlausu fólki, körlum, konum og börnum hafa minnst þrettán verið myrt með köldu blóði í dag.
Alþjóðasamtök þjóðarmorðsfræðimanna (IAGS), voru stofnuð fyrir 30 árum síðan. Telja samtökin um 500 meðlimi og samþykktu þeir sameiginlega ályktun þar sem kemur skýrt fram að stefna Ísraels og hernaðaraðgerðir þess á Gaza uppfylli skilgreiningu þjóðarmorðs samkvæmt sáttmála Sameinuðu þjóðanna um þjóðarmorð frá árinu 1948 - sem er einmitt sama ár og Ísrael lýsti yfir sjálfstæði sínu.
Mikill meirihluti félagsmanna, eða 86 prósent talsins, kaus með ályktuninni:
„Hér er afdráttarlaus yfirlýsing frá sérfræðingum á sviði þjóðarmorðsrannsókna um að það sem Ísrael er að gera á Gaza sé ekkert annað en þjóðarmorð,“ sagði Melanie O'Brien sem er forseti IAGS, við Reuters fréttastofuna.
Að minnsta kosti 63 þúsund íbúar Palestínu hafa verið myrtir í ofsafengnum hefndaraðgerðum Ísraelshers á Gaza síðan 7. október 2023.
Morðin halda áfram á hverjum degi og hafa ísraelsk stjórnvöld takmarkað nær algjörlega flæði hjálpargagna til Gaza; hafa leikið sér að því að myrða með köldu blóði hundruð manna að minnsta kosti við dreifingarstöðvar hjálpargagna; svangt, allslaust fólk - mikið af börnum og konum - hefur verið slátrað eins og búfénaði fyrir það eitt að reyna að sækja sér hjálpargögn því helförin heldur áfram og ef eitthvað er þá hefur þungi hennar aukist jafnt og þétt og er Gaza í raun orðin að einni stórri útrýmingabúð sem er að einu leyti ólík þeim er nasistar settu upp í síðari heimsstyrjöldinni; hún er öllum opin og enginn ber stjörnu.
