Lögregluyfirvöld í Taílandi lögðu nýverið hald á um 1,6 tonn af fíkniefnum sem falin voru undir kálpokum á pallbíl, samkvæmt tilkynningu frá lögreglu. Karlmaður, 39 ára taílenskur ríkisborgari, var handtekinn um helgina og hefur verið ákærður fyrir umfangsmikla fíkniefnasmygl.

Handtakan átti sér stað við bensínstöð í Ayutthaya-héraði. Við leit í bifreiðinni fundu lögreglumenn um 900 kíló af ketamíni og 700 kíló af kristalmetamfetamíni, vandlega pakkað og falið undir pokum með káli.

Samkvæmt lögreglu játaði ökumaðurinn að hafa verið ráðinn til að flytja efnin gegn greiðslu upp á 100.000 taílensk baht, jafnvirði um 375 þúsund íslenskra króna. Hann á yfir höfði sér þungan dóm, en viðurlög við fíkniefnasmygli í Taílandi geta numið allt frá 15 ára fangelsi upp í lífstíðardóm.

Yfirvöld telja líklegt að fíkniefnin hafi verið flutt inn frá nágrannaríki, þó ekki hafi verið tilgreint hvaðan þau komu nákvæmlega.

Taíland hefur lengi verið lykilmiðstöð í alþjóðlegu fíkniefnasmygli í Suðaustur-Asíu. Samkvæmt upplýsingum frá skrifstofu Sameinuðu þjóðanna um fíkniefni og glæpi var lagt hald á alls 236 tonn af metamfetamíni í Austur- og Suðaustur-Asíu árið 2024, sem er 24% aukning frá fyrra ári

Þá segir skrifstofan að Taíland gegni lykilhlutverki bæði sem áfangastaður og milliliður fyrir metamfetamín sem flutt er frá nágrannaríkinu Mjanmar, og að landið hafi skráð mesta magn upptækra fíkniefna á svæðinu.