Glæsilegt og rúmgott einbýlishús við Brekkuás 25 í Hafnarfirði hefur verið sett á sölu. Húsið stendur á einum af eftirsóttari útsýnisstöðum Áslands og er raunstærð þess 341 fermetri. Ásett verð er 269 milljónir króna.

Samkvæmt skráningu Þjóðskrár Íslands er eignin 310,3 fermetrar. Þar af er efri hæð 115 fermetrar, neðri hæð 139,5 fermetrar og bílskúr 55,8 fermetrar. Húsið var byggt árið 2009 og er sagt vera í mjög góðu ásigkomulagi.

Mikið hefur verið lagt í frágang eignarinnar. Gólfhiti er í öllu húsinu auk þess sem hiti er í bílaplani. Granít er á innréttingum og gluggakistum víðast hvar í húsinu en í eldhúsi eru gluggakistur úr gleri. Þá er innfelld lýsing í loftum, aukin lofthæð og hurðir hærri en almennt gerist.

Sérstaka athygli vekur bílskúrinn, sem hefur verið breytt í fullbúna líkamsræktar-, afþreyingar- og tómstundaaðstöðu. Aðstaðan og búnaður hennar fylgja með við kaup á eigninni.

Þar má meðal annars finna hlaupabretti, róðravél og annan líkamsræktarbúnað. Þá eru í rýminu þrír sérhæfðir kæliskápar, sérstaklega ætlaðir fyrir rauðvín, hvítvín og bjór, auk stórs amerísks ísskáps.

Innangengt er í bílskúrinn úr forstofu hússins. Epoxy er á gólfi hans og þar er hiti, rafmagn og vatn auk rafdrifins hurðaopnara.