Ný rannsókn Nordic Safe Cities fyrir Reykjavíkurborg sýnir að neikvæð umræða um hinsegin samfélagið fer vaxandi á netinu. Ein af hverjum tíu athugasemdum um hinsegin málefni inniheldur hatursorðræðu og lýsa niðurstöðurnar aukinni skautun og harkalegri orðræðu en áður.
Niðurstöðurnar voru kynntar á málþingi í Safnahúsinu í dag. Rannsóknin, sem styrkt er af Norrænu ráðherranefndinni, byggir á greiningu 35 þúsund athugasemda á Facebook frá árunum 2022 til 2025.
Sérstaklega er bent á að frásagnir um réttindi trans fólks, fræðslu og kynvitund séu orðnar meginviðfangsefni í umræðunni. Þar sé hinsegin fólki ranglega lýst sem ógn, meðal annars við börn og konur, líkt og einnig sé raunin annars staðar á Norðurlöndum.
Að mati rannsakenda hefur þessi orðræða bein áhrif á líðan og öryggi hinsegin fólks utan netheima. Í viðtölum við samtök hinsegin fólks í Reykjavík kemur fram að hatursorðræða á netinu tengist aukinni áreitni, skemmdarverkum og ótta í samfélaginu.
„Umræðan á netinu er orðin háværari og harkalegri,“ segir Ingvild Endestad hjá Nordic Safe Cities en hún kynnti niðurstöður skýrslunnar. „Frásagnir tengdar menningarstríði um réttindi trans fólks, fræðslu og kynvitund berast auðveldlega milli svæða og móta viðhorf fólks. Það sem gerist á netinu er ekki bara á netinu, heldur hefur það áhrif á hversu öruggt ungt hinsegin fólk upplifir sig í daglegu lífi.“ Hún bætir við að sterk lagaumgjörð dugi ekki ein og sér, samfélagslegur stuðningur og virðing skipti lykilmáli.
„Þótt Reykjavíkurborg sé þekkt fyrir jafnrétti, þá geta stafræn rými valdið fólki óöryggi,“ segir Sabine Leskopf, formaður mannréttindaráðs og starfshóps um verkefnið Saman gegn ofbeld. „Þessi rannsókn gefur okkur dýrmæta innsýn og hjálpar okkur sem borg að bregðast við þessu óöryggi og vernda þar með hinsegin fólk. Við viljum að Reykjavíkurborg sé örugg borg fyrir öll.“
Hún segir niðurstöðurnar mikilvægar fyrir áframhaldandi aðgerðir gegn hatursorðræðu og ofbeldi.
Stefnt er að því að nýta niðurstöðurnar í þróun aðgerða í samstarfi við fjölbreytta hagsmunaaðila. Jafnframt er markmið verkefnisins að hvetja aðrar norrænar borgir til að fylgja fordæmi Reykjavíkur.
Sjá má alla Safer Queer Cities skýrsluna hér.
